‘A gelusia di Pasquale Cinquegrana

Posted by altaterradilavoro on Dic 9, 2019

Sempe ca veco, crideme,
ca tu salute a Rosa,
me sento dint’a ll’anema,
Ciccì, na brutta cosa.

Na smania sorda sorda
ca nun me fa durmire :
quanto me faje suffrire,
io nun t’’o saccio dì !

Sti fatte a mme me pareno
‘na vranca ‘e fronne ‘e rose.
Nu sciuscio e va pe ll’aria
ll’ammore e tutte cose.

Penza ca …si cadisse
e Rrosa t’ajutasse,
te giuro , i’ m’affugasse
p’’a gelusia, Ciccì !

‘A grazzia porta ‘o genio,
‘o genio ‘a simpatia,
‘a simpatia ll’ammore,
ll’ammore ‘a gelusia.

E na gelosa femmena
cchiù ampressa ‘e ll’ate more.
Spisso a chi hê dato ‘o core,
chillo te fa murì !!

‘O ssaccio ca si’ bbuono,
ca ‘o ffaje ‘nnucentamente..
‘O ssaccio, è cosa ‘e niente..
ma..nun m’’o ffà, Ciccì !!

Nun me guardà

di Pasquale Cinquegrana

Nun me guardare cchiù, nennella mia,
cu ‘st’ uocchie gruose,gruosse e nire,nire.
Me cride ? Si tu guarde ‘a chesta via,
‘nu tremmuliccio tu me faje venire..
Nennella mia..famme ‘sta carità..
nun me guardà accussì, nun me guardà.

‘A quanno ‘st’ uocchie tuoje m’ hanno guardato.
forte me sbatte ‘o core a ttutte ll’ ore.
Cchiù nun magno, nun dormo, sto malato..
vide a mme che m’ ha fatto chist’ ammore !
Nennella mia, mo… nun me guardà cchiù…
si no…si i’ moro..’a colpa ‘a tiene ..tu !

‘O càntaro e ‘arciulo stupenda poesia di Gianna Caiazzo

Nu càntaro e n’arciulo,
saglienno p”a ‘Nfrascata,
‘nu juorno se scuntrajeno
pe ccaso mmiez’ â strata.

– Neh, guarda a cchistu càntaro!-
dicette ll’ uno a ll’ ato.
-Ma comme, io songo ‘arciulo
e mme daje ‘sta vuttata?-

– Scusate, Don Arciulo,
nun ll’ aggio fatto apposta,
ma pe scanzà ‘a carretta
so’ gghiuto â parta vosta –
– E stateve cchiù attiento,
ca ccà simmo signure,
nun simmo abbituate
a ffà bbrutti ffigure.-

– E tt’aggio ditto scusa
che vvaje truvanno cchiù?
Mme pare ca p”a strata
nce stisse sulo tu! –

– Ma io songo n’arciulo,
so’ ffine e ddelicato…
tu me putive rompere
cu cchella ddio ‘e vuttata! –