Alta Terra di Lavoro

già Terra Laboris,già Liburia, già Leboria

MAMMA MIA di Arturo Trusiano

Posted by on Apr 28, 2018

MAMMA MIA di Arturo Trusiano

 Vint’ anne so’ ch’ è morta mamma mia
E nun me pozzo ancora fa capace.
Cchiù tiempo passa e cchiù ‘na pucundria
Turmenta ‘o core senza darme pace.


M’ ‘a sonno tutt’ ‘e nnotte e dint’ ‘e suonne
Me vasa ‘nfronte appassionatamente.
‘A parlo, ‘a conto ‘e ppene e me risponne
Comme si fosse viva overamente.

Quant’ era bella ! ‘Na faccella ‘e santa,
dduie uocchie fute, rassegnata e doce,
pareva ‘na Madonna ca se ‘ncanta
annanze ‘o figlio suio ‘nchiuvato ‘ncroce.

Teneva sempre pronta ‘na carezza
c’ ‘o balzamo celeste d’ ‘e pparole,
parole ca ‘int’ ‘o scuro d’ ‘a tristezza
lucevano cchiù assaie ‘e nu raggio ‘e sole.

‘A voce soia ‘ntenereva ‘e pprete,
era ‘na melodia sunata ‘ncielo,
funtana fresca pe’ chi tene sete,
fuoco d’ammore pe’ nu core ‘e gelo.

Uh, quanta vote, ‘nfaccia a chella fiamma,
sentenno friddo, me ce so’ scarfato !
Uh, quanta vote, nu conforto ‘e mamma
Comm’ a ‘na mmedicina m’ha sanato !

Mò tutt’ ‘o munno pare ch’ è sulagno
e veco sempe chiovere a zeffunno,
nisciuno chiagne ‘nzieme a mme ca chiagno,
‘na mano nun se stenne si sto ‘nfunno.

Che sso’ ‘na nnammurata, ‘na mugliera ?
Bene ca vene e va, po’ se ne vola…
‘A mamma sulamente c’ è sincera,
e ‘ncopp’ ‘a terra ’a mamma è una sola.

È una sola ! E s’ ‘a tenesse cara
chi ‘a tene ancora e santa comm’ ‘a mia !
‘Na mamma bona ‘o juorno d’ ogge è rara,
ogge che ‘a vita è tutta ipocrisia…

Addò t’ avuote, cchiù ‘e ‘na ‘nfame vide,
ca pecca, e p’ annasconnere ‘o peccato,
‘o criaturiello suio piglia e ll’ accide
o pure ‘o lassa ‘nterra abbandunato.

So’ mamme cheste? So’ bestie feroce,
peggio d’ ‘e bbelve: ‘a belva nun ‘o ffa.
Chi è mamma overamente, abbraccia ‘a croce,
more, ma ‘o figlio suio ‘o fa campà.

 fonte testo e foto

http://pulcinella291.forumfree.it/?t=75532119 

 

Rispondi

Questo sito usa Akismet per ridurre lo spam. Scopri come i tuoi dati vengono elaborati.

%d blogger hanno fatto clic su Mi Piace per questo: