Dante … moderno, Inferno

Posted by altaterradilavoro on Mag 5, 2022

‘A SCAMPAGNATA

Dint’ a ll’ ora d’ ‘a cuntrora,
quanno ‘o sole t’ appapagna,
na dummeneca d’ estate
ce ne jèttemo ‘ncampagna.

Mmiez’ ‘o vverde, a front’ ‘e mare,
ce fermaimo a na cantina
cu nu scicco pergulato
d’ uva rosa e d’ uva spina.

‘A patrona, ‘onna Carmela,
– nu canisto ‘e simpatia –
quanno asceva cu ‘e pietanze
revutava ‘a tratturia …

– Cavalié, che ve ne pare
‘e stu piatto ‘e vermicielle?
Pe’ sicondo cumannate
na cassuola ‘e purpetielle?

Già sta pronto ‘o fritto ‘e pesce,
Neh, munzù, vuttate ‘e mmane,
ca si no sti cavaliere
nun ce tornano dimane! …

E stu vino? È nu sceruppo!
Sape ‘e fràvule ‘e ciardino.
Signurì, se ne po’ bévere
nu varrile chino chino …

V’assicuro, nun fa male:
è nu vino ‘e vacca doce … –
– Comm’ ‘a vosta ! – io lle dicette
dint’ ‘a recchia, sottovoce.

– Bonanotte! – fa n’ amico –
mantenimmo sta cannela! –
– Ch’ aggia fa’, me so’ nfuscato …
Quant’è bella ‘onna Carmela!

Che capille ‘e seta nera!
Che frischezza ‘e carnaggione!
lle scrivesse nu sunetto,
lle cantasse na canzone … –

Chiano, e quase pe’ risposta
mmiez’ ‘e ffrasche d’ ‘o ciardino,
se sentette all’ intrasatto
nu suspiro ‘e màndulino.

E ‘o cantante d’ ‘a pusteggia
– nu Caruso, v’ ‘o dich’ io –
cu na voce appassiunata
ricamava « ‘O sole rnio ».

Se ncantaie donna Carmela,
zitte stévano Il’ amice :
se senteva, ognuno ‘e lloro,
malinconico e felice .

Fosse ‘o ppoco ‘e sentimento,
fosse ‘o ppoco d’ ‘o Gragnano,
io, guardanno ‘a cantenera,
lle pigliaie na mana mmano …

Ma l’ incanto fuie spezzato
‘a na voce ‘e nu cannone:
– Signurì, ccà ce sta ‘o cunto!
Era ‘a voce d’ ‘o patrone.

DON FERDINANDO

Se sciugliette ‘a cumitiva
nnanze ‘a porta d’ ‘a cantina
mentre ‘o sole tramuntava
mmiez’ a ll’ onne d’ ‘a marina;

chi pigliaie na carruzzella,
chi zumpaie ncopp’ ‘a Cumana …
Io, rimasto sulo sulo,
pe’ na via scura e stramana

me truvaie, mentre ll’ arille
dint’ a Il’ aria prufumata
zerriàvano a migliare
nu mutivo ‘e serenata.

Era Il’ ora triste e doce
ca chi spierto va p’ ‘a via
cchiù pugnente dint’ ‘o core
sente ‘o ppoco ‘e nustalgia …

Io dicevo, cammenanno
pe’ sta via cupa e sulagna:
– Addo’ vaco? addo’ me trovo?
è nu bosco o è na campagna? –

Se senteva ‘a miezo ‘e chiuppe
qualche sisco ‘e rusignuolo
ca pareva, acuto e nzisto,
nu signale ‘e mariuolo,

mentre n’ albero tagliato
mmiez’ ‘a strata, luongo e stiso,
me pareva – che paura! –
quaccheduno muorto acciso.

Affannanno e ntruppecanno
dint’ a chella oscurità,
tutto nzieme veco n’ ombra
ca s’accosta … – Chi sarrà?

A chest’ ora, chi cammina
pe’ stu sito scanusciuto?
Senza n’ arma, chi me scanza?
Mamma bella, aiuto! aiuto! –

Se sentette na resata,
po’ na voce … – Viene ccà…
Ma ched’ è, nun me canusce? … –
– Site vuie, don Ferdinà? ‘ –

D’ ‘o poeta ‘e «’N Paraviso»
era proprio ‘a siluetta
c’ ‘o cappiello miso a’ sgherra,
‘o frustino e ‘a sicarretta.

Isso proprio: ‘on Ferdinando,
bruno, giovene, elegante,
comme steva ‘int’ a du Pierro,
‘o libraro ‘e Piazza Dante.

‘O poeta curazzone,
suonno ‘e tutte ‘e ppiccerelle,
me guardava cu chili’ uocchie
ca parevano doie stelle.

Ricce e nire ‘e mustaccielle,
niro ‘o ciuffo malandrino,
comm’ a n’ ombra dint’ a Il’ ombra
s’ accustaie, me fuie vicino.

– Comme state? – Ile dicette –
che facite ‘a parte ‘e ccà?
Io ve veco e nun ce credo …
Comme state, ‘on Ferdinà?

Sempe Napule è d’ ‘a vosta
comme fùsseve nu rre
e ogne core canta ancora
«Mamma mia ch’ ha da sapé» !

Quanno sona nu pianino
nterra ‘o muolo chino ‘e sole,
parla ancora ‘o Cantastorie
fra scugnizze e varcaiuole… –

‘O poeta me guardaie,
me facette ‘o pizzo a riso,
po’ dicette: – Nun ‘o ssaie?
Mo sto proprio … ‘n Paraviso!

Ce so’ ghiuto overamente
e sto buono ‘ncumpagnia
cu ‘e cchiù guappe paladine
d’ ‘a cchiù bella poesia …

Cu ‘e capille ‘argiento fino
sta cu nuie don Salvatore;
mmiez’ a ll’ àngele, Gaeta
canta ‘e llacreme d’ ammore.

Cc sta Murolo, Capurro,
Tagliaferri, Postiglione
e tant’ ate artiste ‘e core
ca screvevano ‘e ccanzone … –

– Ma, scusateme ll’ardire,
comme va ca site sciso
n’ ata vota ncopp’ ‘a terra,
mentre state ‘n Paraviso? –

– Pe’ vedé Napule bella …
E giacché t’ aggio ncuntrato,
giuvinò, sienteme buono,
tu stai male cumbinato!

Io sagliette ‘n Paraviso,
ma tu hê a scénnere all’Inferno!
– All’Inferno?! E ch’ aggio fatto?
Ma che so’? Dante mòderno?

Fosse almeno ‘int’ ‘a vernata!
Ma c’ ‘o sole ‘e miez’ austo,
sarria meglio nu gelato
che a murì c’ ‘o fìeto ‘arrusto!

– Seh, pazzéa! Ma i’ dico overo!
T’è piaciuto ‘o vino, ‘o juoco?
te perdiste appriesso ‘e ffemmene?
E mo scinne dint’ ‘o ffuoco!

– Dint’ ‘o ffuoco? Eternamente?
Io mo moro, mamma santa! –
– Eh, capisco – accunzentette –
‘a paura fa nuvanta …

Ma chi sa, forse ‘o Signore
te po’ pure perdunà …
Meh, curaggio! T’ accumpagno … –
– Jammuncenne, ‘on Ferdinà!

‘O PAZZARIELLO

Cammenanno sott’ ‘o vraccio
comme stéssemo a Tuleto,
ce avviaimo pe’ na cupa
senza mai vutarce arreto.

Ma che cupa! Era nu fuosso
chino ‘e prete e chino ‘e spine …
Io penzaie: – Certo, stasera
ce cuccammo a ‘e Pellerine!

Doppo tante e tanta guaie,
ce vulesse pure ‘a jonta …
‘O ssacc’ io che strata è chesta:
chesta è strata ca nun spunta!

Nun fuie mai parola ditta:
se sentette nu frastuono,
tutt’ ‘a cupa s’ allummaie
comm’ ‘o cippo ‘e Sant’Antuono;

‘o tturreno sott’ ‘e piede
me sentette sprufunnà
e tremmanno d’ ‘a paura
alluccaie: – Don Ferdinà!

– Giuvinò, fatte curaggio,
pecché già simmo arrivate:
addereto a chella porta
sta l’Inferno cu ‘e dannate. –

Nnanze a nuie, mmiez’ a na lampa
cchiù lucente d’ ‘e bengale,
io vedette nu purtone
ca pareva ‘o Tribunale:

sotto a ll’ arco ‘e stu purtone,
cu ‘a grancascia, ‘o siscariello
e ‘o cappiello d’ammiraglio,
chi ce steva? ‘O Pazzariello!

– Chest’ è bbona! ‘O concertino
all’Inferno?!… E che ce azzecca?
Ma ched’ è, stammo a Natale?
È ll’ Inferno o ‘a Pignasecca?

Meno male, ‘a chiusa è allera:
ce vuleva na sunata!. .. –
Comm’ infatti, ‘o Pazzariello
accummencia sta sparata:

– Bona gente! mala gente!
Per me si va nella città dolente!

Vuie ca site arrivate ccà nnanze,
già sapite ched’ è sta città:
ccà lassate priezze e speranze …
Rataplan, rataplan, rataplà!

Ccà sentite ‘e ghiastemme d’ ‘a gente
ch’ addereto nun ponno turnà;
ccà se volle ‘int’ ‘a pece vullente …
Rataplan, rataplan, rataplà!

Notte e ghiuorno lampéa stu vrasiere
ca nisciuno ha potuto stutà;
addu nuie nun ce stanno pumpiere …
Rataplan, rataplan, rataplà!

Bona ggè, favurite! È mellone
chino ‘e fuoco e ll’ avite assaggià …
Meh, facite nu sisco a ‘o patrone!
Rataplan, rataplan, rataplà!

‘O DIAVOLO

E nu sisco tagliaie ll’ aria
ca p’ ‘e ggrotte cchiù luntane
se spannette, comm’ ‘o sisco
d’ ‘e nnuceile americane …

Nu rummore ‘e fierre viecchie,
ch’ era ‘o suono d’ ‘e ccatene,
rispunnette… e me gelaie
tutt’ ‘o sango dint’ ‘e vvene.

Me scennette ‘a lengua ncanna
senza ‘a forza ‘e chiammà: aiuto!
‘O poeta m’ abbracciaie:
– Figlio mio, mo te saluto.

Chi cumanna a tutte quante
mmiez’ a il’ angele, ha deciso
ch’ arrivato a chesta porta
io turnasse ‘n Paraviso. –

E già ll’ ombra amica e cara
d’ ‘o cumpagno mio gentile
se faceva trasparente,
cchiù liggiera, cchiù suttile …

– Comme, comme, me lassate
sulo sulo mmiez’ ‘e guaie? –
Ma chell’ ombra, a poco a poco,
comm’ a nnùvola, sfumaie …

‘O fracasso d’ ‘e ccatene,
cchiù vicino se sentette:
cu nu lampo e cu nu tuono
‘o purtone s’ arapette…

Russo comm’ a nu granato,
niro comm’ a nu tezzone,
‘o Demmonio accumparette
appuiato a nu furcone:

Comm’ ‘o zimmaro, ca scenne
nzieme ‘e ccrape ‘a copp’ ‘o monte,
mmiez’ ‘e ricce lle sguigliava
na pareglia ‘e corne ‘nfronte …

Era tanta ‘a puzza ‘e pece,
ch’ io facette nu sternuto …
– Santo e viecchio ! – isso dicette
‘a che parte si’ venuto? –

– Grazie tante! – io rispunnette –
Figlie màscule a vuie pure!
Site Antonio dei Cangiani
d’ ‘a Cantata d’ ‘e Pasture?

Ogne sera d’ ‘a Vigilia,
quanno corre ‘o capitone,
v’ aggio ntiso cu Benino,
cu Razzullo e Sarchiapone … –

– Qua’ Cangiane? – me runfaie
cu na voce ‘e contrabbasso –
‘e pigliato chistu zzarro,
bello mio! So’ Satanasso!

Vuo’ trasì dint’ a ll’ Inferno?
Viene ccà, bello d’ ‘o zio!
Io dicette: – Troppo onore!
– No, Il’ annore è tutto mio!

Nun facimmo cumplimente,
cumparié, si’ nu pappone
e m’ ‘e fatto simpatia …
Quanto nzerro stu purtone

e me metto all’ obberienza …
‘A bonànema ‘e Pallino
fa ‘o trattore ‘int’ a Il’ Inferno …
T’ ‘o vuo’ fa nu surzo ‘e vino?

ALL’ INFERNO

I’ passaie pe’ chella porta
addo’ sempe so’ trasute
pe’ scuntà na pena eterna
tutte ll’aneme perdute.

Quanta strille e ch’ ammuina,
quanta folla e che rummore
mmiez’ ‘e strate e dint’ ‘e viche
abbampate da ‘o calore!

‘E pputeche erano aperte,
chiene ‘e lume e chiene ‘e gente;
deva ‘a voce ‘o pizzaiuolo:
– ‘E bbriosce! so’ vullente! –

– Tengo ‘o fummo! ‘e mustacciuole! –
rispunneva ‘o castagnaro,
– Chine ‘e pepe! – cchiù luntano
deva ‘a stesa ‘o maruzzaro.

Na maesta, ca frieva
panzarotte ‘int’ ‘a tiella,
me pareva tale e quale
donn’Amalia a’ Speranzella …

– Mamma mia, me sento ‘a capa
grossa quant’ a nu pallone!
Stammo a Porta Capuana,
a Furcella o ‘int’ ‘o Cavone?

A sentì chesti parole
Belzebù stennette ‘a mano:
– Patriò, damme nu vaso!
so’ pur’ io napulitano!

Pe’ chi campa sottaterra
‘o castigo è troppo amaro!
Si sapisse quanta vote
m’ arricordo ‘e Marechiaro,

si sapisse quanta vote
veglio e chiagno ‘int’ ‘a nuttata !
Sto murenno c’ ‘o gulio
‘e mme fa na varchiata! … –

E na lacrema cucente,
ch’ abbrusciava comm’ ‘o chiummo,
Ile scennette dint’ ‘a barba
ca pareva ‘e nirofummo.

– E va buono, nun chiagnite,
ca si no, vedenno a vuie,
penzo io pure a ‘o mare ‘e Napule
e chiagnimmo tutt’ ‘e dduie.

Chi ve dice che ‘antrasatto
nun vedite, na matina,
‘a cantina ‘e Marechiaro
cu ‘a fenesta ‘e Carulina?

– Hai raggione ! – suspiraie –
tengo ‘o core ‘e nu guaglione …
Giuvinò, me so’ calmato:
meh, cantammo na canzone!

E ‘ntunàimo a core a core
stu mutivo ‘e cuncertino:
« La luna nova ncopp’ a lu mare
stenne na fascia d’ argiento fino … »

‘A TAVERNA

‘A taverna era na grotta
cu nu lume a barilotto
sott’ a ll’ arco e cu na puzza
‘e rraù pigliato sotto.

. Mmiez’ ‘a folla d’ ‘e sciacquante
‘o garzone, Bellipiere,
zuppechianno s’ affannava
cu ‘e butteglle e cu ‘e bicchiere;

e Pallino, ‘o princepale,
– nu chiattone ‘e meza età –
steva arreto a nu bancone
comme fosse nu pascià.

Ccà nu diavolo abbasato
se fumava ‘a pipparella;
llà na chiorma ‘e malandrine
se faceva ‘a passatella;

chi chiammava ‘o miezo litro,
chi chiammava ‘o fritto ‘alice,
chi faceva nu tressette
ncopp’ ‘a votta, cu ll’ amice.

Se nquartava nu demmonio:
– Ma ll’ ‘e letto a Chitarrella?
me fai perdere « cappotto »:
si’ na vera muzzarella!

Nu mbriaco predecava
abbracciato a nu peretto;
chi runfava, chi fiscava,
chi sunava ll’ urganetto;

e nu giovane e na giovane
se guardavano ncantate
comme fanno ‘int’ ‘a caiola
duie canarie nnammurate …

Comme scenne ‘o viento ‘e terra,
se calmaie chistu fracasso
nun appena ch’ io trasette
sott’ ‘o vraccio ‘e Satanasso.

Se susèttero ‘mparanza
giuvinotte e vicchiarielle:
– Salutammo ‘o capintesta!
Guagliù, còppole e cappielle!

– Santanotte! … – E ognuno ‘e lloro
se ne jette, zittu zitto …
– Bellipié, – dicette ‘o Masto –
accummencia cu ‘o zuffritto! –

‘O zuffritto ardeva mmocca
e chiammava ‘o bicchieriello;
doppo ascèttero ‘e ssacicce
subbissate ‘e cerasiello,

certi gàmmere cu ‘o ppepe,
cierti vruòccole arraggiate …
Io dicette: – Mo vulesse
diece o dudice gelate! –

– Qua’ gelate vai truvanno,
qua’ spumone, qua’ granite?
Pe’ refrisco ccà se trova
sulamente ll’ acquavite!

Io nun saccio ‘a quantu tiempo,
bello mio, stammo assetate
‘e na pigna d’uva fresca,
‘e doie cèvoze annevate!

Che vuo’ fa’! Chist’ è ll’ Inferno!
Ma ce sta nu pruggettino
pe’ fa’ scennere ccà bascio
pure ll’ acqua d’ ‘o Serino;

e t’ ‘o giuro ncopp’ ‘e ccorne
d’ ‘a bonànema ‘e papà,
si se quaglia stu pruggetto
faccio cose ‘e nuvità:

voglio mettere fontane
p’ ogni strata e ogni puntone,
ciente banche d’ acquaiuole
chiene ‘e mmùmmere e limone;

e ‘int’ ‘a vasca, pe’ nu mese,
m’ aggia mettere a spugnà,
comme spogna dint’ ‘o cato
‘o mussillo e ‘o baccalà! –

Ditto chesto, s’ aizaie:
– Salutammo ‘o princepale:
sta sunanno mezanotte
e ha da nchiudere ‘o lucale … –

Comm’ infatte, nu rilorgio
sunaie ll’ ora, chianu chiano …
Sott’ a ll’ arco, Bellipiere
steva già cu ‘e cchiave mmano

e ‘a lanterna d’ ‘a cantina
s’era fatta miccia miccia …
Ma i’ vedette, dint’ ‘o scuro,
na signora cu ‘a pelliccia

ca pur’ essa asceva fore
cammenanno lenta e stanca:
sulo Il’ uocchie lle lucevano
mmiez’ ‘a faccia janca janca;

cu na vranca ‘e sciure ‘mbraccio
ce guardava, comme fosse
na sunnàmbula e ogne tanto
lle veneva ‘o ppoco ‘e tosse …

– Chi po’ essere – io dicette –
st’ ombra pallida e malata? ·-
S’ avutaie cu nu suspiro:
– Sai chi so’? So’ ‘a Traviata!

MEZANOTTE

‘A nuttata era scura
e na luna sanguegna
asceva ‘a miez’ ‘e nnuvole, mbrugliate
comm’ a tanta matasse:
‘o rummore d’ ‘e passe
p’ ‘e viche sulitarie
faceva scappà Il’ ombra ‘e qualche gatta.

‘A via pareva eterna:
passaie nu scartellato c’ ‘a chitarra,
passaie nu muzzunaro c’ ‘a lanterna.
Io me guardavo attuorno
penzanno a tanta cose
e suspiranno: quanno schiara juorno?

‘A luna cammenava appriesso a nuie:
pareva quase che ce accumpagnasse;
quanno passava, ‘e llastre d’ ‘e ffeneste
se facevano rosse …

Cu duie tre colpe ‘e tosse
‘a Traviata se schiarette ‘a voce,
sfrunnaie qualche camelia,
dette nu strillo:

– Alfredo! –
e po’ dicette, cu malincunia:
– Si me state a sentì, si permettete,
ve conto ‘a storia mia.

‘A TRAVIATA

Io nascette puverella
mmiez’ ‘e ffrasche d’Antignano
da na mamma lavannara
e nu pate parulano,

ca scenneva albanno juorno,
quanno cantano Il’ aucielle,
cu nu ciuccio e deva ‘a voce
d’ ‘e ccarciòffole e ‘e pesielle.

Russo ‘e faccia e de capille,
era ‘o primmo mbriacone;
tutt’ ‘e ssere, fatto a vino,
ce pigliava c’ ‘o bastone …

E fruscianno ogge e dimane
pe’ Il’ asprinia e ‘o mmaraniello,
se vennette ‘o ppoco ‘e terra,
‘a carretta, ‘o ciucciariello,

pure ‘e chiuove ‘a faccia ‘o muro,
pure ‘e scanne ‘a sotto ‘o lietto …
Vuie capite che dulore
pe’ mammà, malata ‘e pietto,

ca cchiù fina e delicata
se faceva ogne staggione:
quanta lacreme cadevano
dint’ ‘a scumma d’ ‘o ssapone!

Pe’ stu vizio ca teneva
‘e fa’ dint’ ‘a capa ‘e morta,
a papà – salute a nuie –
se rumpette ‘a vena aorta …

Na disgrazia chiamma a n’ ata:
spiraie pure mamma mia
doppo n’ anno, sotto Pasca,
e i’ restaie mmiez’ a na via!

Già tenevo na vucella
fresca e doce, a chell’ età,
ma ero troppo piccerella
pe’ mme mettere a cantà:

e facette ‘a cerenara,
‘a guagliona ‘e stiratrice,
‘a mudista, ‘a sartulella …
Ma nun ero mai felice.

Fuie felice sulamente
quanno, ‘a parte d’ ‘a Riviera,
me ncuntraie cu Alfredo mio
na serata ‘e primmavera.

Quanta stelle ca spuntavano
mmiez’ ‘o cielo rosa e lilla!
Quanta varche mmiez’ ‘o mare,
che prufumo dint’ ‘a Villa!

Comme Il’ ellera s’ attacca,
accussì, perdutamente,
io pe’ sempe m’ attaccaie
a stu povero studente …

Chist’ ammore – ‘o primm’ ammore –
fuie na vera frennesia,
fuie nu fuoco ch’ abbrusciaie
tutta quanta ‘a vita mia;

ma che ghiuorne disperate
quanno ‘o pate, a’ fine ‘o mese,
nun mannava puntualmente
‘e denare da ‘o paese!

Fra miseria e cuntentezza
quase n’ anno era passato …
Na matina (Alfredo steva
cchiù d’ ‘o ssoleto svitato)

sona ‘a porta … Chist’ è ‘o vaglia!
Trase, invece, nu signore
c’ ‘o mantiello e na peròccola …
Era «il vecchio genitore»!

Che Il’ ascette ‘a chella vocca!
Po’ dicette: – Attienta a te!
Si vuo’ fa’ na cosa bona,
lassa a chisto, picceré! –

E tiranno ‘a recchia ‘o figlio:
– Svergognato, farenella,
torna a’ casa, mmiez’ ‘e puorce!
Jesce! fatte ‘a mappatella!

Nun spuntava ancora ‘o sole,
nun cantava ancora ‘o gallo
quanno ‘o pate, ‘o juorno appriesso,
s’ ‘o purtaie c’ ‘o sciaraballo …

Disperata, senz’ ammore,
senza genio ‘e faticà,
me mettette a fa’ ‘a sciantosa,
me facette scritturà.

Ero giovane e carella …
Quanta folla attuorno a me!
Ccà nu conte c’ ‘o bracciale,
llà nu duca c’ ‘o buchè …

Quanno scinne nu scalino,
scinne tutta ‘a gradiata:
‘a figliola se perdette
e nascette … ‘a Traviata.

Io tradette ‘o primm’ ammore,
ca giurai ca fosse eterno:
fui spergiura, Alfredo mio,
e perciò stango all’ Inferno!

… E ccà bascio, si sapisse
che proposte, che mmasciate …
Pure ‘e diavule, oggigiorno,
songo ‘e primme depravate!

Sti peccate ‘int’ a ll’ Inferno?
Succedesse nu scunquasso! … –

E dicenno sti pparole
s’ abbuccaie cu Satanasso.

SCHIARA JUORNO

‘O cielo s’ allummava a poco a poco
e ‘a luna addeventava miccia miccia.
Chianu chiano ll’ Inferno se scetava:
pareva nu vrasiere ca s’appiccia.

‘A tutte ‘e ccase ascevano ‘e dannate,
‘e tramme già passavano e ‘o tramviere
(‘o tramviere ‘e ll’ Inferno è scustumato)
già jastemmava ‘e muorte a ‘e passaggiere.

A chiorme, cu ‘e ventaglie e cu ‘e mbrelline
passavano mudiste e sartulelle,
diavulesse signore e signurine
cu ‘e ccorne piccerelle piccerelle …

Qualche cocò, cu ‘e ghette e ‘a caramella,
asceva lindo e pinto da ‘o barbiere;
cu na guantiera chiena ‘e sfugliatelle
curreva nu garzone ‘e pasticciere …

leva e veneva tutta chesta gente
– dint’ a na nebbia rossa – , a ccà e ‘a llà:
e cammenava mmiez’ ‘o ffuoco ardente,
alleramente, senza s’ abbruscià.

DINT’ ‘O BOSCO

Satanasso s’ avutaie:
– Ccà nun vide gente afflitta
e Il’ Inferno nun è brutto
comm’ ‘e vvote uno s’ ‘o pitta!

Mo pigliammo ‘a carruzzella
(addu nuie ce stanno ancora)
e te porto visitanno
stu paese ‘a dinto e ‘a fora.

Nun l’aveva manco ditto:
cumparette, llà pe’ llà,
na carrozza e nu cucchiere
se mettette a scassià.

‘O Demmonio me mmitaie,
s’ assettaie vicino a me
e ‘o cucchiere ammartenato
dette ‘a voce: – Ah, Farfarié! –

Farfariello?! … Stu cavallo
cammenava ncopp’ a Il’ ova:
era meglio ca ‘o purtava
fora ‘o ponte ‘e Casanova!

E che sole e che silenzio
pe’ sta strata scunzulata!
Nun spirava n’ombra ‘e viento,
‘a campagna era abbrusciata.

Quase sfatto sott’ ‘o sole
ca m’ardeva ‘e ccerevelle,
me vedevo nnanz’ a Il’ uocchie
comm’ a tanta palummelle …

Doppo n’ ora ‘e stu cammino
ch’ era proprio na turtura,
chianu chiano s’ allargaie,
nnanz’a nuie, na macchia scura …

– Gué, cocchié, férmate lloco!
Ile dicette Satanasso. –
Nuie chest’ atu ppoco ‘e via
nce ‘o ffacimmo passo passo … –

Chella macchia era nu bosco,
ma nu bosco malamente:
ogne ramo sicco e stuorto
me pareva nu serpente …

Cammenanno cammenanno,
pe’ nu sfizio ‘e guagliunciello,
io, passanno sott’ a n’ arbero,
ne spezzaie nu ramusciello,

ma restaie c’ ‘a vocca aperta:
comme fa nu sisco ‘e viento
se senteva ‘a dint’ ‘a pianta
nu suspiro, nu lamiento …

Giesù, ll’ arbero chiagneva
e diceva sti pparole:
– Si nu juorno t’ aggio a ttaglio,
carugnò, te ntorzo ‘e mmole!

È na bella guapparia
ca tu faie ! Cu che curaggio
te ne viene ‘a ll’ atu munno
mmiez’ a nuie, pe’ ffà dammaggio?

Tu nun tiene n’ombra ‘e core
e te cride eguale a Dante
ca, passanno dint’ ‘o bosco,
trova Il’ arbero parlante …

Chillo sì ch’era poeta!
Ma tu, piezzo ‘e battilocchio,
stai guardanno e nun capisce
ca i’ so’ Il’ arbero ‘e Pinocchio!

‘O VARCAIUOLO

Quanno ascèttemo d’ ‘o bosco,
ch’ era tutto affatturato,
‘o scenario se cagnaie
comm’ a n’opera ‘e triato.

Nnanze a nuie steva nu lago
chino d’ acqua ca vulleva,
cu nu viecchio ‘int’ a na varca,
ch’ arrivava e che parteva.

Tuorno tuorno, ‘int’ a stu lago,
‘e dannate a mille a mille
alluccavano, chiagnevano,
se sceppavano ‘e capille

e facevano nu coro
che crisceva a mano a mano
comm’ ‘a voce d’ ‘e rranogne
dint’ ‘a Iota ‘e nu pantano.

‘O Demmonio fa nu sisco,
n’ atu sisco Ile risponne;
e ‘a varchetta s’ avvicina
leggia leggia, ncopp’ a ll’ onne.

Ce mbarcàimo. ‘O varcaiuolo
– viecchio cchiù d’ ‘o nnicessario
me pareva « Barbanera
quatte solde ‘o calannario »

e teneva ‘e ricchienielle
comm’a ‘e tiempe d’ ‘o Burbone …
Io spiaie: – Siete Caronte,
l’ammiraglio di Plutone? –

Sbruffaie tale na resata
ca, zumpanno, ‘a varchetella
abballaie pe’ duie minute
‘a mazurca e ‘a tarantella;

po’ dicette, cu na mossa
ch’ era ancora malandrina:
– Ve sbagliate: io so’ Papele,
piscatore ‘e Margellina,

Io pigliavo angine e vòngole,
cannulicchie e fasulare
e lanzavo purpe e ciéfare
sott’ ‘a luce d’ ‘e llampare;

ma me fosse cuntentato
sulamente ‘e stu mestiere!
io purtavo ‘e ccoppie strèuze
a fà… « gite di piacere »

quanno ‘a luna asceva ‘ncielo
e, cchiù ricca ‘e na riggina,
sparpagliava pezze ‘argiento
ncopp’ a ll’ onne d’ ‘a marina.

‘O ffacevo p’ ‘a mangianza …
e pirciò me trovo ccà!
Mio signò, chi va pe’ mare
chisti pisce adda piglià!

E ‘o Demmonio me spiegaie:
– He’ capito? Era nu trucco:
nun faceva ‘o piscatore,
ma faceva ‘o rucco-rucco!

FRANCESCA

‘A varchetta ce pusaie
ncopp’ a n’isola ‘e rimpetto,
comme ‘nterra ‘o puorto d’Ischia
quanno attracca ‘o vapuretto;

e sbarcanno dint’ a st’ isola
– ch’ era ll’isola ‘e Il’ ammore –
io vedette finalmente
qualche fronna, qualche sciore.

Mmiez’ ‘e ppiante ‘e fìcurinie
s’appicciavano ‘e papagne.
Nun passava anema viva
pe’ sti vvie chiare e sulagne …

Tutto nzieme, comme vòlano
duie palumme nnammurate,
accussì vulà pe’ ll’aria
veco Il’ ombra ‘e duie dannate:

e chell’ ombre sciuliavano
legge legge ncopp’ ‘o viento …
Doppo passa n’ ata coppia
e po’ n’ ata … n’ ati ciento …

Io guardavo n’ombra ‘e chelle
cu ‘a faccella tonna e fresca:
Si nun sbaglio, te cunosco
– dicett’ io – tu si’ Francesca!

– Sissignore! – rispunnette –
so’ Francesca ‘a guardaporta …
Me vedite? Sto ali’ Inferno:
aggio avuto ‘a mala sciorta!

Nun avesse maie ncuntrato
chistu nfamo ‘e Gennarino,
ca facette ‘o muschiglione
nnanz’ ‘o vascio d’ ‘o Pennino!

Cu na rosa e na guardata
me sapette fa’ cadé,
mentre ‘e meglie giuvinotte
spantecàvano pe’ me!

Era ‘e maggio: se senteva
qualche arpeggio ‘e mandulino,
nu prufumo ‘e sciure ‘arance
se spanneva d’ ‘o ciardino …

Gennarino, ca restava
dint’ ‘o vascio Il’ ore sane,
me liggeva, chella sera,
nu rumanzo ‘e Mastriane

-e metteva ‘int’ ‘e pparole
tantu fuoco ‘e sentimento
ca, perduta, i’ me cecaie,
fui… « La Cieca di Sorrento » !

Isso ‘a vocca me vasale …
– Dio, ch’ ‘e fatto, Gennarì!
– Francischè, tu me vuo’ bene? –
‘O silenzio fui nu « sl ».

Proprio allora, ddoie vuttate
spaparànzano ‘a purtella
e marìtemo ce spara ·
cu sei colpe ‘e rivultella …

Nun me ‘mporta! Nun mè lagno!
Fui ll’ ammore ca ‘o vvulette!
Chi me scoccia è Gennarino
ca ne spogna fazzulette!

‘O vedite? Chlagne sempe
comme fa nu piccerillo …
Primma vasa… e doppo chiagne,
tale e quale ‘o cuccudrillo!

PULICENELLA

Chi cammina pe’ ll’ Inferno
vede tante e tanta cose:
tanta quadre cummuvente,
tanta scene spaventose …

Chisti quadre e chesti scene
ll’ aggiu viste tutte quante:
pe’ cuntarle esattamente
ce vulesse ‘a penna ‘e Dante.

Ncopp’ ‘e ttàvule ‘e nu ponte
io passaie nu sciummetiello
e truvaie na piazza larga
quant’ ‘o Llario d’ ‘o Castiello;

tanta gente sbatte ‘e mmane,
guarda e ride: m’avvicino
e che veco? N’ ata vota
‘o teatro San Carlino!

Sott’ ‘a porta, n’ombra janca
cu na maschera ‘e cartone,
cu nu càmmeso ‘e bucato,
‘a rezzòla e ‘o cuppulone,

comme fa nu cane ‘e presa
quanno sta buono affamato,
accussì pigliava a mmorze
‘o cuzzetto ‘e nu dannato.

le restaie meravigliato
e dicette: – Ma ched’ è?
mo te magne ‘e crestiane?
Nun si’ tu, Pulicenè? –

L’ombra janca, aizanno ‘a capa,
me guardaie nu poco ‘e renza,
po’, mettenno ‘a mano ‘mpietto,
me facette ‘a riverenza:

– Sì, songh’ io! Pulicenella
a ‘o cumanno d’ ‘o patrone!
Ncopp’ ‘o munno fui busciardo,
femmeniero, mbriacone:

pirciò quanno ‘a Senza naso
me nzerraie sti llucernelle,
‘o demmonio m’ afferraie
comm’ a dint’ ‘e gguarattelle.

Vuò sapé, patrone bello,
ca ncantato si’ rimasto,
pecché nnanze ‘o San Carlino
io me sporpo a stu pullasto?

Chisto è chillo ca venneva
pane e pasta, uoglio e sapone
‘ntiempo ‘e guerra, a piso d’ oro …
Chisto è ‘o primmo carugnone!

Lle fuie doce ‘o cannamèle,
n’ affamaie napulitane!
e pecchesto ‘o piglio a mmorze
mentre ‘a folla sbatte ‘e mmane.

Ma si vide ancora Napule,
tu dincello a sta città
ch’ ha sufferto senza lacreme:
ll’ abbundanza turnarrà!

Turnarranno ‘e ffeste a mare,
‘e ccanzone, ‘a tarantella,
Piererotta, Muntevergene …
Turnarrà Pulicenella!

Frato mio, salutammillo
‘o paese ‘e chisto core:
tutto more e tutto passa ..•
Sulo Napule nun more!

L’ADDIO

Quanno he’ fatto, a buon cumpagno
cu n’amico, ‘a stessa via,
vene n’ ora triste è doce.
ca te dà malincunia …

Era Il’ ora d’ ‘a partenza:
e ‘o Demmonio; ‘ntenneruto,
me vulette a’ casa soia
primma ‘e Il’ urdemo saluto.

‘O salotto era ali’ antica,
cu ‘e ritratte ‘e Il’ antenate,
‘o divano e ‘e pultruncine
dint’ ‘e ffòdere scarlate.

Cu na penna ‘int’ ‘e capille,
tutta càrreca ‘e curalle,
cumparette ‘a Diavulessa
cu ‘o rusolio e cu ‘e taralle:

– Nun facite cerimonie,
jammo, n’ atu bicchierino!
È rosolio fatto in casa
cu Il’ essenza ‘e mandarino… –

Po’ na bella diavulella,
cu ‘a trezzella e ‘a vesta rosa,
se mettette a pianoforte
pe’ sunarce quacche cosa …

Era tarde! ‘E ssalutaie …
Mentre stevo pe’ partì,
Satanasso m’ abbracciaie:
– Torna ampresso, Pascalì!

Io t’aspetto … Tu m’ ‘e data
veramente n’ ora ‘e gioia:
te ne vaie, ma tiene a mente
ca sta casa è casa toia.

– Grazie, grazie, amico mio:
nun te scordo, sta’ sicuro … –
E mmiscaimo ‘e stesse lacreme
dint’ ‘o stesso muccaturo.

N’ automobile, vulanno,
me purtaie, pe’ vìche e strate,
sott’ a Il’ arco d’ ‘o purtone
addò tràseno ‘e dannate;

e ‘o purtone, che a nisciuno
pe’ turnà s’ arape maie,
nnanz’ a me, fra lampe e tuone,
s’ arapette … E i’ me scetaie.

Sissignore, me scetaie …
Stevo ancora ‘int’ ‘a cantina
e tremmava ‘o pergulato
d’ uva rosa e d’ uva spina.

‘A patrona, ‘onna Carmela,
bella, fresca, ‘e buonumore,
pazzianno ce guardava
cu chill’ uocchie sperciacore …

Io dicette: – Ma ll’ Inferno?
Satanasso … ‘o San Carlino? –
– Ma ched’ è, stai danno ‘e nummere?>
Va’, stai proprio fatto a vino! –

E ll’ amice se susèttero …
Dint’ ‘a notte prufumata,
mille arille zerriàvano
nu mutivo ‘e serenata,

mentre ‘o mare cchiù luntano,
senza vele o varchetelle,
s’ addurmeva chianu chiano
sott’ ‘a luna e sott’ ‘e stelle …

fonte