Giovan Battista Basile-Lo cunto de li cunti (XLV)
LA STUFA EGROCA
Giallaise e Cola Iacovo
GIALLAISE
Singhe lo ben trovato, o Cola Iacovo!
COLA IACOVO
Singhe lo ben venuto, o Giallaise!
dimme, da dove viene?
GIALLAISE
Da la stufa.
COLA IACOVO
Co sso caudo a la stufa?
GIALLAISE
Quanto chiù caudo face
tanto meglio!
COLA IACOVO
E non criepe?
GIALLAISE
Creparria, frate mio, si non ce iesse!
COLA IACOVO
E che gusto ’nce truove?
GIALLAISE
Gusto de temperare
le doglie de sto munno,
dove abbesogna d’abbottare a forza,
c’ogne cosa oramai vace a la storza.
COLA IACOVO
Io creo ca me coffie:
pienze che sia cocozza
e ch’io non pesca a funno?
che ha da fare la stufa co lo munno?
GIALLAISE
Quanto cride pescare, manco pische!
pienze tu ch’io te parlo
de chilla stufa dove sì schiaffato
drinto a no cammariello saudo saudo,
che te ’nce affuoche e muorence de caudo?
non, no, parlo de chella
che penzannoce schitto
se smesa ogne dolore
de sta vita angosciosa,
che quanto veo m’abbotta chella cosa.
COLA IACOVO
Io sento cose nove,
me fai strasecolare:
non sì aseno affé quanto me pare!
GIALLAISE
Agge donca a sapere
ch’è na stufa a sto munno
dove vace a colare e male e bene.
Agge gusto e piacere a bottafasce,
agge grannezza a pietto de cavallo,
ogne cosa te stufa e te sfastedia
e che sia vero apre l’arecchie e siente
e ’n tanto te conzola,
ca s’aspetta a sto passo
ogne contento omano ed ogne spasso.
COLA IACOVO
Da vero ca te mierete la ’nferta!
dì puro, ca te sento a canna aperta.
GIALLAISE
Vederrai, verbegrazia,
na bona guagnastrella,
te trase ne l’omore,
’nce manne lo sanzaro,
tratte lo matremmonio,
site d’accordio, chiamme lo notaro,
che faccia li capitole;
saglie, vase la zita,
ch’è tutta sfuorge e scisciole;
tu puro, comme a prencepe
te ’ncigne no bell’abeto,
se chiammano li suone,
se face lo banchetto e se ’nce abballa;
s’aspetta ’nsomma co chiù desederio
la notte, che n’aspetta
viento lo marinaro,
lo scrivano remmore,
lo latro folla e chiaieto lo dottore.
Ecco vene la notte,
notte de male agurio,
che la gramaglia, negrecata, porta,
mentre la libertà, scuro! l’è morta!
lo stregne la mogliere co le braccia
né sa ca so’ catene de galera!
Ma durano tre iuorne
li gnuognole e carizze,
li vierre e cassesie:
ma non iogne a lo quarto,
che subeto se stufa,
iastemma quanno mai ne fu parola,
mardice mille vote
chi ne fu causa. Si la scura parla,
le piglia pe travierzo,
le fa lo grugno e mira co la gronna,
fa l’aquela a doi teste si se corca,
se torce si lo vasa,
e non c’è mai chiù bene a chella casa.
COLA IACOVO
Sfortonato ortolano è chi se ’nzora!
schitto na notte semmena contiente,
po’ mete mille iuorne de tormiente.
GIALLAISE
No patre mo se vede
nascere no nennillo:
oh che gusto, oh che spasso!
subeto lo fa stregnere
co cotriello de seta e de vammace,
comm’a no pisaturo
lo ’ncericcia e l’appenne
tante cose a le spalle:
diente de lupo, fico e meze lune
e coralle e mologne e porcelluzze,
che pare spiccecato
chi accatta zaffarana!
le trova la notriccia,
non vede ped autre uocchie;
le parla cianciosiello:
«Comme czaie, bello ninno?
te vollo tanto bene!
tu zì cole de tata!
zaporiello de mamma!».
E mentre stace attoneto
co no parmo de canna,
sentenno cacca e pappa,
raccoglie ’n zino quanto a chillo scappa!
’ntanto se cresce comme la mal’erva,
e se face spicato comm’a bruoccolo:
te lo manna a la scola
e ’nce spenne le bisole
e quanno ha fatto cunto
vederelo dottore,
ecco l’esce de mano,
piglia la trista via,
se mesca co guaguine,
tratta co malantrine,
fa scogliette e verrelle, e leva o dace,
contrasta co varviere e co scrivane.
Pe sta causa stofato,
o lo caccia o mardice
o pe mettere a siesto
n’ammaro cellevriello,
lo schiaffa carcerato a no castiello.
COLA IACOVO
Presonia che te vuoie…, no figlio tristo,
c’ha le vote de luna,
se cresce o pe lo rimmo o pe la funa.
GIALLAISE
Che vuoi chiù? lo magnare,
ch’è cosa necessaria de la vita,
puro vene ’n fastidio.
’Nfuce buono lo stefano,
’norca, gliutte, ’ngorfisce, schiana, pettena,
scrofoneia, cannareia, mena le masche,
miette sotta a lo naso, inchie li vuoffole
de cose duce ed agre, e magre e grasse,
da puro lo portante a le ganasse,
và pe mazzecatorie e pe bazare:
ca all’utemo dell’utemo,
trovannose lo stommaco ’ndegesto,
fa ’nzorfate le tronola,
li grutte d’ova fracete,
le vene ’nappetenzia
e de sciorte se stufa,
che le fete la carne,
l’ammoina lo pesce,
le cose duce so’ nascienzo e fele,
lo vino l’è nemmico,
e lo mantene a pena lo sorzico.
COLA IACOVO
Cossì non fosse vero,
comme la mala regola
chiù che d’ogne autro a vesentierio manna,
ed ogne male vene pe la canna!
GIALLAISE
Si iuoche a carte, a dale, a trucche, a sbriglie,
a cetranghelle, a schiacche, a le farinole,
se ’nce spenne lo tiempo,
se ’nce arriseca l’arma,
se ’nce mette lo ’nore a compromisso,
’nce lasse lo denaro,
’nce pierde l’amecizia,
non duorme suonno ’nchino,
non magne muorzo ’ntiero,
sempre co lo penziero
a sto marditto vizio,
dove dui so’ d’accordio
pe te mettere ’miezo
e sparteno a mitate lo guadagno.
Puro quanno t’adduone
ca tu ’nce sì ngarzato e sì corrivo,
stufato de le perdete,
quanno vide lo iuoco
vide iusto la gliannola e lo fuoco.
COLA IACOVO
Viato chi lo fuie,
arrasso sia da me, guarda la gamma!
pierde li iuorne, si non pierde argiamma.
GIALLAISE
E li trattenemiente,
che so’ de manco riseco e chiù gusto,
puro te danno sosta:
le farze, le commedie e sagliemmanche,
la femmena che sauta pe la corda,
chell’autra co la varva
e chell’autra che cose co li piede,
li mattaccine co li bagattielle,
la crapa che va ’ncoppa a li rocchielle:
’nsomma stufano tutte li solazze,
e boffune e fazieze e sciuocche e pazze.
COLA IACOVO
Perzò solea cantare Compa’ Iunno:
Non è gusto durabele a sto munno!
GIALLAISE
La museca è na cosa che te vace
pe fi’ a l’ossa pezzelle,
co tante varietà de garbe e muode,
trille, fughe, volate e gargariseme
e fauze e retopunte e passacaglie,
co voce malanconeca od allegra,
o grave o a sautariello,
ped aiero o co la parte
de vascio o de fauzietto o de tenore,
co stordemiente da tasto o da shiato,
e co corde o de niervo o de metallo:
pure ogne cosa stufa,
e, si non stai d’omore,
e t’abbottano niente li permune,
scassarrisse teorbie e colasciune!
COLA IACOVO
Quanno no sta lo cellevriello a siesto,
canta e verna che vuoie,
canta puro lo Stella e lo Giammacco,
è peo na sinfonia che lo sciabacco.
GIALLAISE
De lo ballare non te dico niente:
vide saute rotunne e travocchette
e crapiole e daine
e scorze e contenenze:
pe no poco te piace e te da gusto,
ma po’ cura è d’agusto:
quatto motanze stufano,
né vide l’ora che se caccia ’n campo
lo ballo de la ’ntorcia o lo ventaglio
pe appalorciare, scomputa la festa,
stracco de pede e siseto de testa.
COLA IACOVO
Senz’autro è tiempo perzo
ed a fare catubba
se strude assai, né se guadagna zubba.
GIALLAISE
Scommerziune e pratteche,
e spasse e commonette co l’ammice,
lo bevere e sguazzare
pe drinto sse taverne
e lo sbordelleiare pe sse Ceuze
e mettere la chiazza sotto sopra,
co sferrecchie e copierchie de latrine,
no stare abbiento mai,
lo cellevriello ad argata
e lo core a centimmolo,
passato chillo shiore
quanno lo sango volle,
te stufa chiù d’ogn’autro
e, vascianno la capo
ed appesa a lo fummo la scioscella,
te retire e te fai lo fatto tuio,
stufato de chille anne
che danno ombre de gusto e vere affanne.
COLA IACOVO
Quanto piace all’ommo
comme fuoco de paglia,
che passa e sporchia e sparafonna e squaglia!
GIALLAISE
Non c’è sienzo a la capo
che n’aggia li crapicce:
ma subeto se stufa
l’uocchie de remirare
cose pentate e belle,
sfuorge, bellezze, quatre,
spettacole, giardine, statue e fraveche;
lo naso d’adorare
garuofane, viole, rose e giglie,
ambra, musco, zibetto,
vruodo conciato e arruste;
la mano de toccare
cose molle e cenede,
la vocca de gustare
voccune cannarute e muorze gliutte,
l’arecchie de sentire
nove fresche e gazette.
’Nsomma, si fai lo cunto co le deta,
quanto fai, quanto vide e quanto siente
tutto viene ’nsavuorrio, e spasse e stiente.
COLA IACOVO
Troppo starria ’ncrastato co la terra
l’ommo, ch’è fatto schitto pe lo cielo,
s’avesse a chisto munno
sfazione compruta;
però te schiaffa ’mocca
l’affanne a sporta e li piacire a sprocca.
GIALLAISE
Sulo na cosa è chella
che non te stufa mai,
ma sempre te recreia,
sempre te face stare
contento e conzolato:
e chesto è lo sapere e lo docato.
Perzò chillo poeta
grieco deceva a Giove
co caude prieghe da lo core sciute:
«Damme, signore mio, purchie e virtute!».
COLA IACOVO
Hai no cantaro e miezo de ragione,
ca non te sazia mai l’uno né l’autra:
chi have agresta e sale,
pe l’oro è granne e pe vertù ’mmortale!
Fu tanto gostosa l’egroca, che a gran pena ’ncantate da lo piaceres’addonattero ca lo Sole, stracco da fare tutto lo iuorno Canario pe licampe de lo cielo, avenno cacciato a lo ballo de la ’ntorcia le stelle,s’era retirato a mutarese la cammisa, perzò comme veddero vruoco l’aiero,dato l’ordene solito de tornare, se retirattero ogne una a le case loro.
SCOMPETURA DE LA IORNATA TERZA
continua……
invio in corso...
