Giovan Battista Basile-Lo cunto de li cunti (XLVI)

Posted by altaterradilavoro on Apr 4, 2024

QUARTA IORNATA

Poco ’nanze era sciuta l’Arba a cercare lo veveraggio a li fatecature, ca poco poteva stare a spontare lo Sole, quanno li princepe ianche e nigre se trovattero a lo luoco de l’appontamiento, ne lo quale erano poco ’nanze arrivate le dece femmene, c’avennose fatto na ventrecata de ceuze rosse avevano fatto lo musso comm’a mano de tentore, che tutte ’nziemme se iezero a sedere a canto na fontana, che serveva de schiecco a cierte piede de cetrangolo mentre se ’ntrezzavano le capo pe cecare lo Sole.

Le quale, fatto penziero de passare ’n quarche manera lo tiempo fi’ che fosse l’ora de menare le masche, pe dare gusto a Tadeo ed a Lucia commenzaro a descorrere si devevano ioquare a seca mautone, a capo o croce, a cucco o viento, a mazz’e piuzo, a la morra, a paro o sparo, a la campana, a le norchie, a le castellucce, ad accosta palla, a chioppa o separa, a lo tuocco, a la palla o a li sbriglie. Ma lo prencepe, ch’era sfastediato de tante iuoche, ordenaie che venesse quarche strommiento e se cantasse fra tanto. E subeto na mano de serveture, che se delettavano, vennero leste co colasciune, tammorrielle, cetole, arpe, chiuchiere, vottafuoche, crocro, cacapenziere e zuche-zuche e, fatto na bella sofronia e sonato lo Tenore de l’Abbate, Zefero, Cuccara Giammartino e lo Ballo de Shiorenza, se cantattero na maniata de canzune de chillo tiempo buono che se pò chiù priesto trivoliare che trovare e, fra l’autre, se dissero: Fruste ccà Margaritella, ca sì troppo scannalosa, che ped ogne poco cosa tu vuoi ’nanze la gonnella. Fruste ccà Margaritella.

E chell’autra, Vorria, crudel, tornare chianelletto e po’ stare sotto a sso pede; ma, si lo sapisse, pe straziarme sempre corrarisse.

Secotaro appriesso: Iesce, iesce, sole, scaglienta ’Mparatore! scanniello d’argiento che vale quattociento, ciento cinquanta tutta la notte canta, canta Viola lo mastro de la scola, o mastro mastro mannancenne priesto, ca scenne mastro Tiesto co lanze co spate, co l’aucielle accompagnate.

Sona, sona zampognella, ca t’accatto la gonnella, la gonnella de scarlato, si non suone te rompo la capo.

Non lassanno chell’autra, Non chiovere, non chiovere, ca voglio ire a movere! a movere lo grano de mastro Giuliano.

Mastro Giuliano prestame la lanza, ca voglio ire ’n Franza, da Franza a Lommardia dove sta madamma Lucia! Ora, mentre stevano a lo meglio de lo cantare, venettero le vevanne ’n tavola, e, magnato a crepapanza, Tadeo decette a Zeza che facesse capo, ’ncignanno la iornata co lo cunto suio. La quale, pe secotare lo commannamiento de lo prencepe, cossì decette:

Fruste ccà Margaritella,

ca sì troppo scannalosa,

che ped ogne poco cosa

tu vuoi ’nanze la gonnella.

Fruste ccà Margaritella.

E chell’autra,

Vorria, crudel, tornare

chianelletto e po’ stare

sotto a sso pede;

ma, si lo sapisse,

pe straziarme sempre corrarisse.

Secotaro appriesso:

Iesce, iesce, sole,

scaglienta ’Mparatore!

scanniello d’argiento

che vale quattociento,

ciento cinquanta

tutta la notte canta,

canta Viola

lo mastro de la scola,

o mastro mastro

mannancenne priesto,

ca scenne mastro Tiesto

co lanze co spate,

co l’aucielle accompagnate.

Sona, sona zampognella,

ca t’accatto la gonnella,

la gonnella de scarlato,

si non suone te rompo la capo.

Non lassanno chell’autra,

Non chiovere, non chiovere,

ca voglio ire a movere!

a movere lo grano

de mastro Giuliano.

Mastro Giuliano

prestame la lanza,

ca voglio ire ’n Franza,
da Franza a Lommardia
dove sta madamma Lucia!

Ora, mentre stevano a lo meglio de lo cantare, venettero
le vevanne ’n tavola, e, magnato a crepapanza, Tadeo
decette a Zeza che facesse capo, ’ncignanno la iornata co lo
cunto suio. La quale, pe secotare lo commannamiento de
lo prencepe, cossì decette:

continua………