Alta Terra di Lavoro

già Terra Laboris,già Liburia, già Leboria olim Campania Felix

L’educazione sessuale:poesia di Ugo Azzolino

Posted by on Dic 19, 2019

L’educazione sessuale:poesia di Ugo Azzolino

Eppure sta balorda umanità
nun sape proprio cchiù che va truvanne.
Se fanne ‘e figlie “a miliune d’anne
mo, tutt’assieme, ce ‘o vonno mparà.
Si sape chistu fatto ‘o cane mio
chisà quanta resate ca se fa,
e già… pecchè dicesse: “baccalà!
si proprio nun ‘o ssaìe t’ ‘o dich’io!”

I’ ammetto ‘a scola guida p’ ‘a patente,
pecchè guida’ oggi è pericoloso
e, quindi, è giusto far lo scrupoloso
pe’ scongiurà nu guaio o n’incidente
Ma pe’ fa’ ‘e figlie nun ce vo` ‘a patente!
Ma vuo’ vede’ ca ogge pe’ fa’ ammore,
t’hê studia’ l’interno d’ `o… ‘mutore’?
Stu fatto è overamente divertente!

Ma che ce ponno di’ a na criatura
ca tene appena appena sette ott’anne?
Che ce hanno ‘a dì? Mammà e papà che fanne
‘a notte chiuse ‘nt’ ‘a na stanza oscura?

Oppure hanno ‘a spiegà ‘a cunetta, ‘o dosso,
‘o senso unico o alternato,
addò se passa, addò è vietato,
comme hanno ‘a fa quann”o signale è rosso?

Ma chistu ccà è nu fatto naturale!
Ccà nun se tratta ‘e circolazione
e ‘o vigile ca fa ‘a contravvenzione
pecchè nun saie ‘o codice stradale!
Ma cheste songo overe cose ‘e pazze!
Si jamme ‘e chistu passo ‘e studentelle
a scola purtarranno ‘e cupertelle,
e ‘e studentielle, certo, ‘e matarazze…

Po’ ce starrà ‘o suggetto assaie sgubbone,
‘o tipo ch’è attaccato a studia’…
diciteme na mamma ch’addà fa?
…ate ca felle ‘e carne e zambaglione!

Na cosa nun capisco, nun l’afferra!
Vi giuro ca me lassa assai perplesso,
comme farranno po’… c’ ‘o ‘terzo sesso’?
Eppure ce ne stanno ncopp’ ‘a terra!

Forse ‘o penziero mio sarrà ‘e nu fesso,
ma credo che a riguardo a chistu sesso,
o so’ cretine o so’ prufessuresse,
‘e figlie se faranno semp’ ‘o stesso!

fonte https://pulcinella291.forumfree.it/?t=77189534

Submit a Comment

Il tuo indirizzo email non sarà pubblicato.

*

Questo sito usa Akismet per ridurre lo spam. Scopri come i tuoi dati vengono elaborati.