’Na dummeneca passa..di Rocco Galdieri

’Na dummeneca passa e n’ata vene,
e tutte ’o stesso e tutte tale e quale!
’I quant’accunte c’ ’o barbiere tene!
’I quanta folla ’int’a dd’ ’o spezziale!
’E tramme chiene…. ’E carruzzelle chiene…
Passano ’a princepala e ’o principale,
che vanno ’a messa e apparo apparo vanno.
Passa ’o cullegio… Duie carabiniere…
’Na serva cu ’na guardia duganale,
ca s’alliscia ’o mustaccio e ca passanno,
se mmira ’int’ ’a vetrina d’ ’o barbiere.
Gente che vene e va senza penziere,
sott’all’arbere ’ncopp’ ’o marciappiere…
(E st’arbere ’e Furia c’ogne anno, ogne anno,
cchiù s’acalano ’ncopp’ ’o marciappiere,
ma cchiù verde e cchiù morbede se fanno…)
’E tramme chiene… ’E carruzzelle chiene…
Cchiù giovene esce ’accunto d’ ’o barbiere.
Cchiù cresce ’a folla ’int’ ’a dd’ ’o spezziale!
E comme addora ’sta pasticciaria!
’Na dummeneca passa e n’ata vene,
e tutte ’o stesso e tutte tale e quale
pe’ me… che guardo l’arbere ’e Furia!
Chist’arbere ’e Furia c’ogne anno, ogne anno,
cchiù verde e malinconiche se fanno!
fonte
’Na dummeneca passa..di Rocco Galdieri con traduzione – LE POESIE DEGLI ALTRI (forumfree.it)