‘O culore d’e pparole di Eduardo

Posted by altaterradilavoro on Set 2, 2025

Quant’è bello ‘o culore d’e pparole

e che festa addiventa nu foglietto,

nu piezzo ‘e carta –

nu’ importa si è stracciato

e po’ azzeccato –

e si è tutto ngialluto

p’ ‘a vecchiaia,

che fa?

Che te ne mporta?

Addeventa na festa

si ‘e pparole

ca porta scritte

so’ state scigliute

a ssicond’ ‘o culore d’ ‘e pparole.

Tu liegge

e vide ‘o blù

vide ‘o cceleste

vide ‘o russagno

‘o vverde

‘o ppavunazzo,

te vene sotto all’uocchie ll’amaranto

si chillo c’ha scigliuto

canusceva

‘a faccia

‘a voce

e ll’uocchie ‘e nu tramonto

Chillo ca sceglie,

si nun sceglie buono,

se mmescano ‘e culore d’ ‘e pparole.

E che succede?

Na mmescanfresca

‘e migliar’ ‘e parole,

tutte eguale

e d’ ‘o stesso culore:

grigio scuro

Nun siente ‘o mare,

e ‘o mare parla,

dice.

Nun parla ‘o cielo,

e ‘o cielo è pparlatore.

‘A funtana nun mena.

‘O viento more.

Si sbatte nu balcone,

nun ‘o siente.

‘O friddo se cunfonne c’ ‘o calore

e ‘a gente parla cumme fosse muta.

E chisto è ‘o punto:

manco nu pittore

po’ scegliere ‘o culore d’ ‘e pparole

Eduardo De Filippo