Alta Terra di Lavoro

Giovan Battista Basile-Lo cunto de li cunti (II)

Posted by altaterradilavoro on Gen 19, 2024

LO CUNTO DELL’UERCO TRATTENEMIENTO PRIMMO DE LA IORNATA PRIMMA

Antuono de Marigliano, ped essere l’arcifanfaro de li catammare cacciato da la mamma, se mese a li servizie de n’uerco, da lo quale volenno vedere la casa soia è regalato chiù vote, e sempre se fa corrivare da no tavernaro; all’utemo le da na mazza la quale castiga la ’gnoranza soia, fa pagare la penetenza all’oste de la furbaria e arricchisce la casa soia.

Giovan Battista Basile-Lo cunto de li cunti

Posted by altaterradilavoro on Gen 18, 2024

PRIMMA GIORNATA

’NTRODUZIONE

Fu proverbeio de chille stascioniato, de la maglia antica, che chi cerca chello che non deve trova chello che non vole e chiara cosa è che la scigna pe cauzare stivale restaie ’ncappata pe lo pede, come soccesse a na schiava pezzente, che non avenno portato maie scarpe a li piede voze portare corona ’n capo. Ma, perché tutto lo stuorto ne porta la mola e una vene che sconta tutte, all’utemo, avennose pe mala strata osorpato chello che toccava ad autro, ’ncappaie a la rota de li cauce e quanto se n’era chiù sagliuta ’mperecuoccolo tanto fu maggiore la vrociolata, de la manera che secota.