Giovan Battista Basile-Lo cunto de li cunti (XXII)
LA TENTA EGROCA
Cola Ambruoso e Marchionno
COLA AMBRUOSO
Fra tutte quante l’arte, o Marchionno,
a la tenta se deve, comme disse
non saccio si fu guattaro o si cuoco,
dare lo primmo vanto e primmo luoco.
MARCHIONNO
Io nego consequenza, o cola ambruoso,
perché chessa arte lorda,
ca vai co le manzolle
sempre de galla, vitrivuolo e asumma,
comm’a petena iusto de cargiumma.
COLA AMBRUOSO
Anze, è la chiù polita
fra tutte l’esercizie,
cosa de n’ommo appunto
che vo’ parere nietto ed è sedunto.
MARCHIONNO
Me darrai a rentennere
che sia de sprofformiero
o de ragammatore!
và tornatenne, và, c’hai fatto arrore!
COLA AMBRUOSO
Io te voglio provare,
e mantenere drinto de no furno,
ca l’arte de tentore
è cosa de segnore.
Chesta a lo iuorno d’oie s’usa fra tutte,
co chesta l’ommo campa
ed è tenuto ’n cunto,
aggia ’mbruoglie a lo cuorpo,
aggia vizie a lo pietto,
ca co la tenta copre ogne defietto.
MARCHIONNO
Comme ’nc’entra lo vizio de la vita
co la tenta de lana e capisciola?
COLA AMBRUOSO
Comme se vede ca non sai decola ambruoso!
tu te cride ca parlo
de tegnere cauzette o pezze vecchie!
la tenta che dico io
è d’autra cosa ch’inneco o verzino,
tenta che fa parere a le perzone
lo colore mortella ’ncarnascione!
MARCHIONNO
Io sto drinto a no sacco,
non te ’ntenno spagliosca,
ca sto parlare tuio ’mpapocchia e ’nfosca!
COLA AMBRUOSO
Vì, ca si tu me ’ntienne
te ’mezzarrai tentore
o puro de canoscere chi tegne
ed averrai gran gusto
’mparare st’arte nova, arte che corre
fra la gente chiù scautra,
arte, che piglia a patto
no scarafone, che te para gatto!
siente: sarrà na forca de tre cotte,
che scopa quanto ’matte, e quanto alluma,
che n’auza quanto vede,
ch’azzimma quanto trova,
ora chi sa sta tenta
no le da nomme ’nfamme
de latro mariuolo,
de furbo marranchino,
ma dirrà ca se serve
de lo iodizio e caccia li denare
da sotta terra, abbusca e saria buono
a campare fi’ drinto de no vosco,
che s’approveccia ed è no buono fante,
saraco tartarone e percacciuolo,
corzaro de copella,
che non perde la coppola a la folla.
E ’nsomma co ssa tenta,
cossì bella e galante,
piglia nomme d’accuorto no forfante!
MARCHIONNO
’Aglie, tu me vai ’nchienno pe le mano!
chesta è n’arte de spanto,
ma n’arte che non resce a poverielle,
si no a cierte masaute,
a li quale è conciesso de chiammare –
venenno da lontano –, asciutte asciutte,
agie li grancie suoi, li furte frutte!
COLA AMBRUOSO
’Nce sarà no potrone votafacce,
no iodio cacavrache, na gallina,
no poveriello d’armo,
core de pollecino,
sorriesseto, atterruto,
agghiaiato, schiantuso,
che tremma comm’a iunco,
sempre fila sottile,
sempre ha la vermenara,
lo filatorio ’n cuorpo,
e le face paura l’ombra soia;
s’uno lo mira stuorto
fa na quatra de vierme,
si n’autro l’ammenaccia, tu lo vide
comm’a quaglia pelata,
deventa muorto e spalleto,
le manca la parola
e subeto le veneno li curze;
si chillo caccia mano, assarpa e sbigna.
Ma co sta tenta nobele,
lo teneno le gente
pe perzona prodente,
posata, ommo da bene,
che vace co lo chiummo e lo compasso,
né piglia strunze ’m buolo,
né a denare contante
compra le costiune,
non eie esca de corte,
se fa lo fatto suio,
è quieto e cagliato.
De sta manera, o figlio,
è tenuto pe vorpe no coniglio!
MARCHIONNO
Me pare che la ’ntenne
chi se sarva la pelle:
ca na vota leiette,
a na storia, non saccio
si fatta a mano o a stampa,
c’un bel fuir tutta la vita scampa.
COLA AMBRUOSO
Ma po’ dall’autra parte,
vide n’ommo de punto,
un ommo arresecato, ommo de core,
che non cede mollica a Rodomonte,
che sta da toccia a toccia co n’Orlanno,
che sta da tuzzo a tuzzo co n’Attorre,
che non se fa passare
la mosca pe lo naso, ed ha li fatte
’nante che le parole,
che fa stare a sticchetto e fa che metta
dui piede into na scarpa
ogne tagliacantone e capoparte;
votta buono le mescole,
have armo de leone,
s’accide co la Morte,
né da mai passo arreto e sempre ’meste
comm’a no caperrone;
ma, s’è misso a sta tenta,
è tenuto da tutte
pe no scapizzacuollo ’mpertenente,
temerario ’nsolente,
no toccuso, no pazzo vetreiuolo,
no tentillo, no fuoco scasacase,
che te mette lo pede ad ogne preta,
che te cerca l’arrisse co lo spruoccolo,
n’ommo senza ragione,
una perzona rotta e senza vriglia,
che non è iuorno che non fa scarriglia,
che fa stare ’nquiete li vecine,
che provoca le prete de la via;
’nsomma è stimmato n’ommo che vedemmo
degno de rimme, degno de no rimmo!
MARCHIONNO
Zitto, c’hanno ragione,
perché perzona sapia ed aggiustata
è chi se fa stimare senza spata!
COLA AMBRUOSO
Ecco ’nc’è no spizeca,
uno muorto de famme,
uno stritto ’n centura,
una vorza picosa, una tenaglia
de caudararo, cacasicco e stiteco,
uno roseca-chiuove,
no cavallo senese,
no cetrangolo asciutto,
no suvaro suino, uosso de pruno,
na formica de suorvo, no speluorcio,
mamma de la meseria, poveriello,
che comme a no cavallo caucetaro
’nante darrà no paro de panelle
che no pilo de coda,
no grimmo ed aggrancato
che corre ciento miglia
né le scappa no picciolo,
che darrà ciento muorze a no fasulo,
che farrà ciento nodeca
a na meza de cinco,
e che non caca mai pe no magnare.
Ma se remedia subeto a sta tenta,
e se dice ch’è n’ommo de sparagno,
che non ietta o sbaraglia chello c’have,
che non face la robba
ire pe l’acqua a bascio,
ch’è buon ommo de casa
e ire no ne fa mollica ’n terra:
all’utemo è chiammato
(ma da certe canaglia)
ommo ch’è no compasso, ed è tenaglia!
MARCHIONNO
Oh che sporchia sta razza,
c’hanno lo core drinto a li tornise!
fa diete non dette da lo miedeco,
porta ciento pezzolle,
sempre lo vide affritto,
se tratta da guidone e da vaiasso,
e more sicco ’miezo de lo grasso!
COLA AMBRUOSO
Ma lo revierzo po’ de la medaglia
è di chi spanne e spenna:
darria funno a na nave,
darria masto a na zecca,
sacco scosuto, ietta quanto tene,
che non fa cunto de la robba c’have.
Le vide ciento attuorno,
scorcogliune, alivente,
senza nulla vertute,
ed isso a bottafascio le refonne.
Sfragne senza iodizio,
votta senza ragione,
dace a cane ed a puorce
e se ne vace ’n fummo.
Ma co sta tenta acquista openione
de n’armo liberale,
de cortese, magnanemo e ientile,
che te darria le visole,
ammico de l’ammice,
puzza de re, mai nega a chi le cerca;
e co sta bella rasa
sfratta le casce e sfonnola la casa!
MARCHIONNO
Ne mente pe la canna
chi chiamma liberale uno de chisse:
liberale è chi dace a tiempo e a luogo,
né ietta pataccune
a gente senza ’nore ed a boffune,
ma refonne li scute
a povero ’norato, e c’ha vertute.
COLA AMBRUOSO
Vide no magna-magna,
pignato-chino, piecoro lanuto,
Martino, cervenara, sauta e tozza,
una casa a doi porte, cauzature,
che vene da Cornito
ed ha casa a Forcella,
un accorda-messere, uno tauriello
ch’è quatro oregenale
de la ’nfamia e retratto de la copia.
E, tinto isso perzine,
lo chiammano quieto, ommo da bene,
galant’ommo, che fa lo fatto suio,
e se la fa co tutte,
è co tutte cortese,
tene la casa aperta pe l’ammice,
non va co zeremonie, né co punte,
buono comm’a lo pane,
doce comm’a lo mele,
ne fai quello che vuoie;
e ’ntanto, senza fare
niente la facce rossa,
fa mercato de carne, e sarva l’ossa!
MARCHIONNO
Chisse oie campano a grassa,
uno de chisse schitto
vede se va de notte a la taverna,
po’ ca pe l’ossa luce la lanterna.
COLA AMBRUOSO
N’ommo sta reterato,
né pratteca co guitte e co verrille,
fuie le scommerziune,
non vo’ doglie de capo,
non vole dare cunto
a lo tierzo, a lo quarto,
vive sempre quieto,
patrone de se stisso,
non have chi lo sceta quanno dorme,
né le conta li muorze quanno magna.
Puro ’nc’è chi lo tegne,
e lo chiamma foriesteco e sarvaggio,
na merda de sproviero,
che n’adora né fete,
no spruceto, no ’nsipeto,
rusteco, cotecone,
n’ommo senza sapore e senz’ammore,
sciaurato, bestiale,
catarchio, maccarone senza sale.
MARCHIONNO
O felice chi stace a no desierto,
ca non vede né abbotta!
dica chi vole: io trovo
no mutto assai provato
meglio sulo che male accompagnato.
COLA AMBRUOSO
Ma po’, dall’autra banna,
truove no commerzevole,
che se fa carne ed ogna co l’ammice,
no buon compagno affabele,
che tratta a la carlona.
E co sta tenta, chi lo crederria,
trova chi lo retaglia e forfecheia,
cose e scose, e lavora a pilo-’mierzo,
e le face la causa da dereto,
chiammannolo sfrontato, miette-’nante,
pideto-’m-braca, fronte a pontarulo,
strenga rotta ’n dozzana,
sfacciato, petrosino d’ogne sauza,
che vo’ mettere sale a quanto vede,
che vo’ dare de naso a quanto sente,
’ntrammettiero, arrogante, ’mpacciariello:
auzate chesso e spienne, o poveriello!
MARCHIONNO
’Nce vole chesto, e peo!
lo spagniuolo la ’ntese,
che disse ha no gran piezzo:
la muccia chella es causa de despriezzo!
COLA AMBRUOSO
Si n’ommo pe ventura
parla sperlito, chiacchiara e trascorre,
e fa pompa de ’nciegno e de loquela,
e dovunca lo tuocche e lo revuote
lo truove spierto e te responne a siesto,
sta tenta l’arreduce de manera,
che n’auza no cappiello
de no parabolano cannarone,
de na canna de chiaveca,
d’uno che darria masto a le cecale,
c’ha chiù parole che non ha na pica,
che te ’ntrona la capo e te scervelleca,
co tanta paparacchie e filastoccole,
tanta cunte dell’uerco,
e co tanta taluorne e visse-visse,
che, quanno mette chella lengua ’n vota
co na vocca de culo de gallina
te ’nfetta, te stordisce e t’ammoina.
MARCHIONNO
A sta età de sommarre
fa quanto vuoie, ca sempre tu le sgarre!
COLA AMBRUOSO
Ma s’un autro te stace zitto e mutto,
caglia, appila ed ammafara,
e se stipa la vocca pe le fico,
no lo siente na vota pipitare,
sta tenta te lo muta de colore,
ca n’è chiammato Antuono, babione,
muscio, piezzo d’anchione, mammalucco,
comm’a cippo de ’nfierno,
sempre friddo e ielato,
comme la zita che male ’nce venne.
Tanto, che pe sto gorfo
trammontana io non veo:
si parle tristo e si non parle, peo!
MARCHIONNO
Veramente oie lo iuorno
non sai comme trattare,
non sai comme pescare,
non c’è strata vattuta a chi cammina:
viato chi a sto munno la ’nevina!
COLA AMBRUOSO
Ma chi porria mai dire fi’ a lo rummo
l’affette de sta tenta?
ca ’nce vorria mill’anne senza fallo,
né vastarria na lengua de metallo!
facciase che se voglia,
tratta comme te piace, ad ogne muodo
se le cagna colore, ed è chiammato
lo boffone faceto,
che da trattenemiento;
lo spione, che sape lo costrutto
d’Agebilebo munno;
lo forfante ’ncegnuso e saracone;
lo pigro ommo flemmateco,
lo cannaruto ommo de bona vita,
l’adulatore bravo cortesciano,
che canosce l’omore
de lo patrone e che le vace a bierzo;
la pottana cortese e de buon tratto;
lo ’gnorante ch’è semprece e da bene.
Cossì de mano ’mano,
va descorrenno e suffecit!
Perzò n’è maraveglia s’a la corte
lo tristo pampaneia,
lo buono se gualeia,
perché so’ li signure
gabbate da sta tenta a li colure,
e fanno cagno e scagno,
comme sempre s’è visto,
lassanno l’ommo buono pe lo tristo.
MARCHIONNO
Negrecato chi serve!
oh che meglio la mamma
l’avesse fatto muorto!
corre borrasca, e mai no spera puorto.
COLA AMBRUOSO
La corte è fatta sulo
pe gente viziosa,
che ne tene lo buono sempre arrasso,
e lo leva de pede e botta e sbauza.
Ma lassammo sti cunte:
ca, mentre me se raspa a dove prode,
no scomparria pe craie né pe pescrigno:
perzò facimmo punto e ’nsoperammo,
mo che lo sole ioqua a covalera,
che farrimmo lo riesto
Ma lassammo sti cunte: ca, mentre me se raspa a dove prode, no scomparria pe craie né pe pescrigno: perzò facimmo punto e ’nsoperammo, mo che lo sole ioqua a covalera, che farrimmo lo riesto n’autra sera! Chiuse tutte a no stisso tempo la vocca Cola Ambruoso e lo iuorno lo Sole; pe la quale cosa, appontato de tornare la matina appriesso co nova monizione de cunte, se ne iettero a le case loro, sazie de parole e carreche d’appetito.
SCOMPETURA DE LA IORNATA SECONNA
continua……..
invio in corso...
