Matenata ’e vierno di GIOVANNI CAPURRO

Posted by altaterradilavoro on Mar 14, 2023

’O friddo scioscia, taglia proprio ’a faccia:
pe’ ll’aria cupa cupa, senza sole,
’e ppagliuchelle, ’e ffronne, ’e piezze ’e carta
votano attuorno.
Arravugliato ’int’ a ’na petaccella
’e scialle viecchio, tutto spertusato,
’o lavurante corre, scarfa ’e mmane
forte c’ ’o sciato.
Ma ’e mmane, rosse comme è russo ’o naso,
so’ già gelate… Che buò dà calimma!
Forze ’o ri’ sordo ha dato a ’e figlie, e penza
’a presa ’e rumma!
Luntano siente ’na voce: “C’ ’o brodo
’a fresellina, chiena ’e sale e pepe!”.
E ’e piezze ’e neve, comme a sciucchetielle,
chioveno ncuollo!

fonte

Matenata ’e vierno di GIOVANNI CAPURRO con traduzione – LE POESIE DEGLI ALTRI (forumfree.it)