Trapenarella

Posted by altaterradilavoro on Ago 1, 2023

Trapenarella c’o trapenature
trapena ‘a mamma e ‘a figlia pure
e trapenianno ‘nmiezo a ‘sti guaie
canto ‘a canzone d’a cuccuvaia.

Na signurina cammina p’a strada
‘nu giuvinotto lle fà ‘na guardata
e chella ch’è subito femmena onesta
areto ‘o purtone s’aiza ‘a vesta.

San Genna’ pienzace tu
ca tanto d’e corna nun se campa cchiù!

‘Nu preveto ‘ncoppa all’altare maggiore
te pare ‘nu santo predecatore
ma quanno va dinto a sacrestia
vo’ mille lire p’a Ave Maria

San Genna’ tu vide a chiste
‘mbrogliano pure a Gesù Cristo!

Nuce, nucelle, castagne ‘nfurnate
quante paise aggio curriato
‘a Torre d’o Grieco a Nunziata
e quante guaie aggio truvato
e quante difiette c’aggio cantato.

‘E cul’a mappata so’ veneziane
‘e magnapolenta songo ‘e Milano
‘e meglie cantante stanno a Giuliano
‘e tirapistole stanno a Casale

‘E facce toste songo italiane
‘e cchiù mafiuse so’ siciliane
e po’ ‘e sbruffune songhe e rumane
‘e femmene belle so’ napulitane
‘e mazz ‘e scope so’ americane.

‘E mbruogliamestiere so’ ll’ingegnere
‘e ‘mbruogliamalate so’ ll’avvocate
‘e prievete songhe è zucalanterne
‘e cchiù mariule stann’o guvierno.

San Genna’ dice ca sì,
chi o ssape comme và a ffernì!

‘Na signurina pe’ via Dei Mille
s’ha miso ‘a parrucca ‘a copp’e capille
quanno và a casa se magna ‘e purpette
e chi tene famme guarda ‘e rimpette.

‘E cunuscite a sti ‘milorde’
e chille stanno ‘nguaiate ‘e sorde
‘e pate so’ tante scurnacchiate
e ccampano ‘ncopp’a famme ‘e Il’ate.

‘Nu giuvinotto cu ‘e sorde d’o pato
s’accatta ‘o cazone ‘mpusumato
po’ và dint’a machina allero allero
e vvò menà sotto a chi va appere.

San Genna’ pienzace tu
ca tanto de ‘mbruoglie nun se campa cchiù!

Me ne vaco pe’ sotto ‘o muro
e sento addore de’ maccarune.
Me ne vaco pe’ Qualiano
e sento addore d’e patane.
Me ne vaco p’o Ranatiello
e sento addore d’e friarielle.

Ma si vaco add’o putecaro
tutta cosa va cchiù caro.
Ma verite maie quanno
sta miseria va aumentanno
e aumenta oggi e aumenta dimane
… e doppodimane.

Sabato si e Dummeneca no.
Chi fatica se more ‘e famme
‘na vota ca si e ‘na vota ca no
Chi fatica se more ‘e famme
‘na vota ca si e ‘na vota ca no.

fonte

http://www.ilportaledelsud.org/trapenarella.htm

Pagina a cura di Astrid Filangieri

[1] Eugenio Pragliola (Rio 1907 – Giugliano NA 1989): posteggiatore (oggi si direbbe “artista di strada”). Per notizie su Pragliola, consultare http://www.prolocogiugliano.it