Giovan Battista Basile – Lo cunto de li cunti (LVII)
LA VORPARA EGROCA
Narduccio e Cicco Antuono
NARDUCCIO
Prestame na patacca, o Cicco Antuono,
e pigliate lo pigno!
CICCO ANTUONO
Affé, la prestaria de bona voglia
si non avesse appunto stammatina
fatto na bella spesa.
NARDUCCIO
È mala sciorte mia; ma che accattaste?
CICCO ANTUONO
Trovai no buono scuntro
de na vorpara nova
che si millanta scute ne cercava,
tanto ’nce averria spiso!
NARDUCCIO
Sì corrivo a lo spennere!
na vorpara lo chiù che pò valere
non passa dui carrine.
CICCO ANTUONO
Mo sì, Narduccio mio! non te ne ’ntienne.
Bene mio, tornatenne!
non sai ca le vorpare so’ sagliute?
già pescavano cate, mo li scute!
NARDUCCIO
Comme, pescano scute? io non te ’ntenno.
CICCO ANTUONO
Sì n’aseno e perdoname.
Tu me pare che mo vienghe a lo munno.
Non sai ca non c’è ommo
che non tenga a la mano na vorpara?
co chesta campa e sguazza,
co chesta sforgia e ’ngrassa,
chesta le mette bona paglia sotta,
pe chesta vene a ’nchiudere li puorce,
co chesta luce e se fa chino ’n funno,
co chesta ’nsomma domena lo munno!
NARDUCCIO
Me fai strasecolare e ire ’n estrece!
che volimmo ’nguagiare
ca t’hai ’nchioccato dareme a rentennere
la luna ne lo puzzo,
e ch’io gliotta che sia pe cosa rara,
lape felosoforo, na vorpara?
CICCO ANTUONO
Apunto chesto, è lapis
sciuto da lo lammicco de lo ’nciegno!
NARDUCCIO
Frate, pe te la dire, aggio manciato
lo pane de chiù forna,
né mai l’aggio sentuta mentovare:
o io so’ scianne o tu me vuoi ’nfoscare.
CICCO ANTUONO
Apre l’aurecchia e ’mezza,
ca sì no nsemprecone.
Poche gente la chiammano vorpara,
perché a la primma ’nfanzia
da quarche mala facce;
perzò li belle ’nciegne
l’hanno cagnato nomme,
perzò che a chesta etate
tutte le cose vanno ammascarate.
Lo prencepe le dace
titolo de presiento o donativo;
lo iodece l’ha puosto
nomme de lieto gagio e ammollamiento
o d’ontata de mano o de voccone;
lo scrivano deritto e sa lo cielo
s’è stuorto chiù de n’anca de no cano.
Lo mercante guadagno,
l’artesciano facenna,
lo potecaro ’nustria,
lo mariuolo ’nciegno o maniucco,
lo sbirro toccatiglia,
lo vannito composta,
lo sordato recatto,
lo spione lo fatto,
la pottana regale,
lo roffiano abbusca, o paraguanto,
lo sanzaro la dice veveraggio,
lo commissario la chiamma percaccio.
’Nsomma le da colore
lo corzaro de spoglie,
lo capitanio de quieto vivere:
si n’è quieto, tornace,
ca porta lo striverio e la ruina,
e t’assicuro affé ca fa chiù guerra
co la vorpara soa che co la sferra!
vuonne chiù? lo poeta
che spoglia de conciette e di parole
quante libre le ’matteno a le mano,
e Aratro e Avidio e Mafaro e Nasone,
le dace nomme de ’mmetazione!
NARDUCCIO
Te ’ntenno, aglie, pe domene!
me riesce affé, tu sì no bravo fante,
de li quatto dell’arte, de coppella,
no bello tartarone ed eccicuorvo,
sì de lo quaglio, arcivo e sapatino:
vuoi dire mo ca tirano d’ancino!
CICCO ANTUONO
Ed ancino e vorpara
songo na cosa stessa!
vasta, ca non è ommo
che no la porte sempre a la centura,
chi d’oro, chi d’argiento e chi de ramma,
chi de fierro o de ligno, secunno qualità de le perzone
Comm’a dicere mo: chillo grann’ommo
che conquistaie lo munno,
pe pescare li regne
se l’avea fatta d’oro,
’ncrastata de carvunchie e de diamante.
E chillo che salare
fece tante verrinie a Cicerone,
la portava d’argiento;
l’autre de mano ’n mano,
secunno lo iodizio e lo potere
la fanno comme ponno:
vasta c’ognuno pesca,
e perzò a sto pescare
è puosto vario nomme:
arrocchiare, affuffare, arravogliare,
allegerire, auzare e sgraffignare
ed arresediare ed azzimmare,
shioshiare, scervecchiare, piuziare,
cottiare, annettare e granciare,
zeppoliare e fare maniucche,
fare arravoglia-Cuosemo,
fare netta-paletta,
fare priore, sonare lo zimmaro,
scotolare vorzillo,
e menare lo grancio.
NARDUCCIO
Tutto chesto puoi dire
co na parola schitto:
ioquare a trionfiello,
robbare e assassenare!
CICCO ANTUONO
Sì de mala mammoria! io t’aggio ditto
ca lo munno, oie lo iuorno,
dace a lo male titolo de bene,
né ped autro lo ’nciegno s’assottiglia
che pe mettere ’n opra sta vorpara,
che tira e non si vede,
c’aggrappa e non se sente,
c’afferra e non se tocca,
e sempre piglia e sempre acciaffa e ’ncrocca.
NARDUCCIO
Frate mio, senza ’midia,
c’ogne cosa po’ va pe l’acqua a bascio:
de lo male acquistato
non se ne gaude mai lo terzo arede;
la gente ricca a funno vace a funno,
se vedeno le case scarropate,
le ienimme destrutte e ’mpezzentute,
sempre spierte e demierte,
ca disse buono no mastro de scola:
Tutto lo stuorto ne porta la mola.
CICCO ANTUONO
Ogge li cuolle stuorte
so ’mpise da la famme,
chi no arrobba no ha robba,
chi non piglia no ha paglia,
chi non abbusca ave sempre a l’arma abbasca,
e chi non pesca mai, mai non fa Pasca!
NARDUCCIO
A lo restituire,
fammene tre cavalle!
otra che spisso spisso,
na forca de tre cotte,
goliuso abbuscare babuine,
è puosto pe decreto
’ncoppa a no ciuccio comm’a babione,
ha da la corte na mitria de carta,
a lo mercato vedese mercato,
pe non soffrire famme resta ’nfamme,
perde lo ’nore pe sguazzare n’ora,
pe no poco de ramma
se percaccia no rimmo,
lo zuco de l’agresta
le torna acqua de maro,
pe aggraffare co l’ogna
se procura tre legna,
le penne le deventano pennone:
che serve tanta cuoccole ed argiamma,
tanta sbruonzole e purchie
e picciole e pennacchie
e frisole e fellusse,
si ped essempie e prove tante e tante
non è contento mai chi ha chiù contante?
CICCO ANTUONO
Si tu pruove na vota sta vorpara,
non te ne spise chiù, ch’è comm’a rogna,
che quanto gratte chiù chiù da prodito.
Dammo na giravota
pe l’arte e pe l’afficie de sto munno,
e vedarai ca se ne serve ogn’ommo.
Commenzammo da prima, ed antemonia,
da chi tene vassalle:
ecco abbista ed allumma no massaro
che s’ha ’nchiuso li puorce,
oie le cerca pe ’mpriesto tante scute
da retornarencille
quanno po’ chiove passe e fico secche;
craie manna pe tanto uorgio
pe lo restituire a la recouta;
mo le commanna l’aseno, o li vuoie,
co titolo ca serve pe la corte;
e tanto durarà sto frusciamiento,
tanto secotarà st’ammaro assedio
che chillo, desperato,
fa quarche ’ngioriata a lo vaglivo,
o le ioca de mano. Oh negrecato,
che no l’avesse cacato la mamma,
che s’avesse spezzato
la noce de lo cuollo! ecco, è pigliato
e schiaffato de pesole a na fossa,
puosto cippe a li piede,
misso fierre a lo cuollo
e manette a le mano
co no spetaffio puosto a lo canciello:
Banno e commannamiento: olà, sfrattate!
chi parla a chisto paga sei docate!
’Nsomma, grida che vuoi,
manna memoriale, miette mieze,
non è mai liberato,
si dapo’ tante acite
de strazie e de tormiente,
de spese e de travaglie
non fa quarche composta.
All’utemo che ha fatto de no lupo
chiena la voglia e sazia,
mentre assassina è ditto ca fa grazia.
NARDUCCIO
O mardetta vorpara!
malannaggia la forgia sbregognata
dove fuste vattuta e temperata!
CICCO ANTUONO
Siente. Lo capitanio, e mastrodatta,
perché da lo voie granne
è ’mezzato d’arare lo vetiello,
’nfruceca testemmonie, ’mbroglia carte,
alloga le settenze,
occupa le scritture,
carcera senza causa,
e loco la vorpara fa pe sette,
e, dove deveria
essere strascinato, piglia nomme
ch’è pratteco a l’affizio,
ch’è n’ommo percacciuolo ed ha iodizio!
NARDUCCIO
Chesto è chiù ca lo vero,
e si n’ommo da bene se ne torna
nietto de vorza comme
è nietto de coscienzia,
cosa che m’è socciesso
fuorze dudece vote, ognuno dice
che meglio se ne stia,
ca non è arte soia
e ca è peccato a darele patiente,
ch’è no catarchio e ca non fa proviente.
CICCO ANTUONO
Lo miedeco, si è tristo,
tira a lungo lo male,
e tene parte co lo speziale;
s’è buono, puro mostra
ca fra tante rizette
puro sa sto secreto,
quanno stenne la mano da dereto.
NARDUCCIO
De ssa vorpara non puoi dire male,
ch’è modesta e ’norata;
anze, premio fatale
chisto se pò chiammare:
paghe dereto a chi te fa cacare!
CICCO ANTUONO
Lo mercante non perde
la coppola a la folla:
da la robba stantiva,
la teletta ’ncollata
pe le dare lo piso,
iura, sconciura, afferma
ca lo fraceto è nuovo,
ca lo sfatto è de trinca
e co belle parole e triste fatte
te ’mpapocchia e te mostra
lo ianco pe lo nigro; e truove sempre
drinto a la mercanzia quarche magagna
ed a lo mesurare,
co no galante sfarzo,
stira lo drappo azzò lo truove scarzo.
NARDUCCIO
Perzò no è maraviglia
quanno lo cielo le vota la faccia,
e pe no fallo perdeno la caccia.
CICCO ANTUONO
Lo chianchiero te venne
no caperrone viecchio e malaticcio
pe crastato magliato,
no mazzone pe ienco,
che te l’apara tutto
d’oro brattino e shiure,
pe fare cannaola;
venne l’ossa pe porpa e contr’assisa
e sempre è chiù la ionta che lo ruotolo,
a lo pesare po’ dio te ne scanza!
ioca de deta e scenne la velanza.
NARDUCCIO
È cosa d’abbottare li permune!
perzò la festa pareno barune.
CICCO ANTUONO
L’agliararo te ceca a la mesura,
e pe mostrare ca te dace a curmo
l’uoglio, e ca arriva a signo,
carca lo funno de lo mesoriello,
che tanto s’auza quanto fa scartiello;
mesca sempre la semmola co l’uoglio,
che da cuorpo e colore:
vide na scumma d’oro,
inchie no bello agliaro
e po’ truove na feccia,
anze truove na mesca d’acqua e morga,
che drinto na locerna negra e amara
te fa lo piccio, pedeteia e spara.
NARDUCCIO
Non c’è parmo de nietto,
ogne bene è passato:
munno corrutto e quanto sì cagnato!
CICCO ANTUONO
Lo tavernaro ha le carrafe scarze,
tutta la notte trafeca,
e si trova la votte
c’ha d’averzeto o liento na stoccata,
le fa de ianco d’ova na stoppata;
ma sopra tutto spacca
lo vino buono co lo vino tristo,
fa de l’acito asprinio,
anze de l’acqua vino
e co le deta copre lo cannuolo,
de la carrafa, e ’ngarzate la vista,
che mai non vide la misura trista.
NARDUCCIO
Oh nigro chi ’nce ’matte,
c’abbesogna co loro
no stommaco de fierro e vozza d’oro!
CICCO ANTUONO
Lo cositore face la bannera,
e vede ad ogne taglio se ’nc’è taglio:
mette lo filo a cunto de la seta,
si lo puorte a comprare
vace co l’aco ’m pietto,
te fa largo lo patto
e torna a lo mercante pe lo fatto.
Ma chesto è manco sale:
a la lista te ’mbroglia,
che mardice, a lo leiere lo cunto,
lo nigro punto che t’hai puosto ’m punto.
NARDUCCIO
Oh viate, oh felice l’anemale,
che ponno stare nude
a buosche, a valle, a chiane ed a pennine,
né viveno soggette a ste roine!
CICCO ANTUONO
Siente li robbe-vecchie a la Iodeca,
si te vene crapriccio
de vennere quarcosa:
’nce truove na confarfa,
tanto che sì pigliato pe la canna;
s’accatte no vestito,
mo te lo miette e mo lo truove rutto,
che dura da Natale a Santo Stefano,
e co danno e co scuorno
vai pinto e punto a no medesmo iuorno.
Ma che ire toccanno tante taste?
ca ’nce vorria na resema de carta
a dire tutte quante
l’arte che fanno onore a sta vorpara,
e quante sbrisce e sicche
se so’ fatte pe chesta e grasse e ricche!
NARDUCCIO
’Menzione mardetta,
tuosseco de lo ’nore,
pe la quale se vede
scura la verità, negra la fede!
CICCO ANTUONO
Dì quanto vuoi, c’ogne uno se ne serve!
io mora strangolato co na funa
si pe tutto oie non me ne compero una!
NARDUCCIO
Oh meglio te schiaffasse l’antecore!
si aduopre la vorpara a chisto munno, co la vorpara sì tirato a
funno.
Non saperria dicere si de la bella ielatina de sta iornata piacesse chiù la capo o la coda, perché si l’una fu saporita, l’autra se ne scese drinto a le medolla de l’osse e fu tanto lo gusto de lo prencepe che, pe mostrarese cortese e liberale veramente da signore, chiammaie lo guardarobba e ordenaie che se desse a li recetante na nforra de cappiello viecchio, che fu de lo vavo. E, perché lo Sole era stato chiammato de pressa all’autro polo pe soccorrere a li state suoie occupate dall’ombre, auzatose da sedere se pigliaro la strata ogne uno a la pagliara soia, co commissione de tornare la matina co l’appontamiento stisso a lo medesemo luoco.
continua…….
invio in corso...
