Giovan Battista Basile – Lo cunto de li cunti (LVIII)

Posted by altaterradilavoro on Apr 17, 2024

GIORNATA QUINTA

Già l’aucielle referevano a la ’masciatrice de lo Sole tutte li ’mbruoglie e tappolle che s’erano fatte la notte, quanno lo prencepe Tadeo e la prencepessa Lucia s’erano conzignate mateniello mateniello a lo luoco soleto, dove se n’erano venute a sisco nove femmene de le dece. La quale cosa vista lo prencepe domannaie perché non era venuta Iacova e, dettole ca l’era pigliata na scesa scoperta, ’n sanetate soia!, commannaie Tadeo che se trovasse n’autra femmena che sopperesse a lo luoco de chella che mancava.

E cossì, pe non ire troppo lontano, fecero venire Zoza, che steva faccefronte lo palazzo riale, la quale fu recevuta da Tadeo con granne compremiento, si pe l’obreco che le teneva, comme pe la ’ncrenazione ed affrezione che l’aveva puosto.

La quale ’nsiemme co l’autre avenno cuoto chi nepeta shioruta, chi spiche a dosso, chi aruta a cinco e chi na cosa e chi n’autra, chesta se fece na giorlanna comme si avesse da recetare na farza, chella no grammaglietto, l’una se ’mpizzaie na rosa spampanata ’m pietto, l’autra se mese no garofano scritto ’mocca.

Ma perché ’nce volevano fuorze quatto ora a secarese pe miezo lo iuorno, azzò maturasse lo tiempo de smorfire, ordinaie lo prencepe che se facesse quarche iuoco pe trattenemiento de la mogliere e, dato penziero a Cola Iacovo lo scarco, ommo de granne ’nciegno, isso, sì comme avesse ’n saccocciola le ’menziune, subeto la trovaie, decenno: «Fu sempre ’nsipeto, signure mieie, chillo gusto che non ha quarche rammo de iovamiento. Però non foro trovate li trattenemiente e le veglie pe no piacere dessutele, ma pe no guadagno gostuso perzì, pocca non sulo se vene a passare lo tiempo co sta manera de iuoche, ma se scetano e fanno prunte li ’nciegne a saperese resorvere e a responnere a chello che se demanna, comm’a punto soccede a lo iuoco de li iuoche c’aggio pensato de fare, lo quale sarà de chesta manera: io proponeraggio a quarche femmena de chesse na sorte de iuoco, la quale senza penzarence m’ha da dicere subeto ca no le piace e la causa perché no le dace a l’omore; e chi tardarrà a responnere o responnerà fore de preposito aggia da pagare la pena, che sarà fare chella penetenza che commannarrà la segnora prencepessa. E, pe dare prenzipio a lo iuoco, io me vorria ioquare co la segnora Zeza na mezza patacca a trionfiello!». E Zeza subeto respose: «Non ce voglio ioquare, perché no so’ mariola!».

«Bravo!», disse Tadeo, «ca chi arrobba ed assassina chillo trionfa!».

«S’è cossì», leprecaie Cola Iacovo, «me trovo no quatto e miezo pe ioquaremillo co la segnora Cecca a banco falluto ». «Non me ’nge catacuoglie», respose Cecca, «ca non so’ mercante!». «Ha ragione», disse Tadeo, «ca pe lloro è fatto sto iuoco».

«A lo manco, segnora Meneca», secotaie Cola Iacovo, «passammo no paro d’ore a lo malecontento». «Perdonateme, ca chisso è iuoco de cortesciane!», respose Meneca.

«‘Nge ha dato a lo chiuovo!», disse Tadeo, «ca sta razza de gente maie stette de bona voglia!».

«Io saccio», repigliaie Cola Iacovo, «ca la segnora Tolla se ioquarrà co mico na seina de pubreche a quatto mentune ». «Lo cielo me ne scanze!», respose Tolla, «ca chisto è iuoco de marite c’hanno mala mogliere». «Non potive responnere meglio», respose Tadeo, «ca sto iuoco è fatto pe lloro, che spisso spisso fanno a tozza-martino».

«A lo manco, segnora Popa», leprecaie Cola Iacovo, «ioquammo a binte fegure, ca ve dongo la mano». «Non sia pe ditto», respose Popa, «ca chisso è iuoco d’adulature! ». «Ha parlato d’Orlanno!», disse Tadeo, «ca chisse fanno vinte e trenta fegure, trasformannose sempre che bonno pe mettere dintro a lo sacco no povero prencepe».

E, secotanno, Cola Iacovo disse: «Segnora Antonella, non perdimmo sto tiempo, previta vostra, ma ioquammonge no bello piatto de zeppole a la gabella». «L’hai trovato! », respose Antonella, «manco male che me tratte da femmena mercenaria!». «Non dice male», disse Tadeo, «ca sta ienimma de femmene se soleno spesse vote ’ngabellare ».

«Diascance arrivala!», secotaie Cola Iacovo, «io me la ’nsonno ca se ne passarà l’ora senza pigliareme spasso, si la segnora Ciulla non se ioqua co mico na mesura de lupine a chiammare». «E che so’ fatta sbirro?» respose Ciulla.

E Tadeo subeto refose: «Ha ditto veramente de truono, perché afficio de li vaglive e de li tammare è lo chiammare a Corte».

«Vienetennella, segnora Paola», tornaie a dire Cola Iacovo, «e ioquammonge no tre de cinco a picchetto».

«L’haie sgarrata», respose Paola, «ca non so’ mormoratore de corte!». «Chesta è dottoressa», respose lo prencepe, «ca non c’è luoco dove chiù se picca lo ’nore de li qualisse c’a le case nostre».

«Senz’autro», repigliaie Cola Iacovo, «la segnora Ciommetella se contentarrà de ioquare co mico a carrettuso».

«Merregnao!», respose Ciommetella, «bello iuoco de masto de scola m’avive trovato!». «Chessa deve pagare la pena », disse Cola Iacovo, «che non ha che fare la proposta co la resposta». «Và fatte tornare li denare da lo masto!», respose lo prencepe, «ca la resposta ’ncascia de Seviglia, perché li pedante ioquano cossì bravo a carrettuso che sì be’ perdeno cinco, sengano la partita».

Ma Cola Iacovo, votatose all’utema delle femmene, le disse: «Non me pozzo dare a credere che la segnora Zoza voglia refutare comme l’autre no ’nvito; perrò me farrà piacere ioquarese co mico no cianfrone a sbracare ». «Guarda la gamma», respose Zoza, «ca chisso è iuoco de peccerelle». «Ora chessa sì deve fare la penitenzia », concruse Tadeo, «perché a sto iuoco ’nce ioquano pe fi’ a li viecchie; e perzò, segnora Lucia, tocca a buie de darele la pena».

E, auzatase Zoza se iette a ’ngenocchiare ’nante la prencepessa, la quale l’ordinaie pe penitenzia che cantasse na villanella napoletana; la quale, fattose venire no tammorriello, mentre che lo cocchiere de lo prencepe sonava na cetola, cantaie sta canzona: Si te credisse dareme martello e c’aggia filatiello, ca faie la granne e ’ncriccheme lo naso, và, figlia mia, ca marito te n’ha raso! Passaie lo tiempo che Berta filava e che l’auciello arava e non sento d’Ammore o frezza o shiamma: spelata è Patria, mo non ’ng’è chiù mamma! Và, c’hanno apierto l’uocchie li gattille, so’ scetate li grille, si faie niente speranza a sse bellizze, và ca n’haie sceca, quanto curre e ’mpizze! Aggio puosto la mola de lo sinno, né chiù me movo a zinno, e già conosco dalla fico l’aglio! Non ’nge pensare chiù, ca non ’ng’è taglio! Scompette a tiempo la canzona e lo gusto di tutte quanno si misero le tavole, a dove si ’nce fu buono da smorfire ’nce fu meglio da shioshiare; ma, comme fu sigillato lo stommaco e levato li mesale, fu dato commannamiento a Zeza che scoperesse l’accoppatura de li cunti. La quale, si be’ steva chiarella, c’aveva fatto la lengua grossa grossa e l’aurecchie piccerelle, po’ fece lo debito suo cossì dicenno:

continua……..